Wir^a) graf Donat von Tokkenburg¹ graf ze Brettengo^e2 vnd ze Thafaus³ tůnd kund vnd veriehent offenlich mit vrkund diss briefs allen den, || die in an sehent lesent oder ho^errent lesen, dz wir mit vorbedahtem můt vnd gůtem willen fúr vns vnsern brůder graf || Diethelmen⁴ vnd vnserr erben den hof ze Lutenwille⁵ gelegen in Turtal⁶ gelegen genant Rissis hof ze rehtem erblehen || verlihen hant, als hie nach gescriben stat, vnd habint den selben hof mit allen rehten núzzen vnd zůgeho^erden verlihen dem erbern kneht Wilhelmen Turman vnd allen sinen kinden, es sient knaben oder tohtran, die er gewint bi Elsbeten Wa^ekerlin siner elicher wirtin, vnd sond vns^b) vnd vnsern erben ja^erlich von dem selben hof ze rehten szinsen geben ain pfund pfenning gna^emer Costenzer múnss vnd sond den selben zins ja^erlich rihten ze sant Martis tag ane alle geua^erd vnd ane ab gang, vnd sin allú vorgeschribnú ding vnd geding beschehen vnd vollefu^ert mit aller ehafti hantvesti worten werchen ra^eten vnd geta^eten, so dar zů gůt núzze vnd notdúrftig warent vnd dar zů gehort von reht vnd gewonhait. Vnd des ze vrkúnd vnd ze merer sicherhait aller vorgescribner ding vnd geding hant wir graf Donat von Tokkenburg da vor genant vnser insigel offenlich gehenket an disen brief. Der geben ist ze Liehtenstaig⁷ in vnser statt an dem nachsten ma^entag vor sant Johans tag ze sunwenden in dem iar, do man zalt von Cristus gebúrt drúzehenhundert iar, sybenzig iar vnd darnach in dem núnden jare.

Source Fulltext: Chartularium Sangallense IX, Nr. 5716, S. 374.