Allen den, die disen brief ansehent, lesent alder ho^erent lesen, tv^on ich Sophie¹ hern Frideriches des Tvmben von Nuwenburch² efrowe kv^ont || vnde vergihe offenlich an disem briefe, das ich nach miner frvnde rat vnde miner voigte grafen Hvges mines brůders³ vnde hern || Swiggers des Tvmben willen vnde henden den wingarten ze dem Aichholtze⁴ vnde Haynriche Hanekamp ze Bernanc⁵ vnde zwo guch||arte^a) akers vnder dem wingarten, die minem vorgenanden ewirte her Friderich ze taile w^ordent, vnde minen vnde miner kinde tail der holzer ze den Henkelen⁶ vnde der auwe, dv da haisset in Diken Auwe⁷, dem erbern rittere hern Růdolfe von Roschach⁸ han ze kophene geben rehte vnde redelich vnde vor reht aigen vm sibene vnde fvnfzich march lo^etiges Silbers Chostenzer geweges, die ich enphangen han vnde in minen vnde miner kinde nvtz komen sint. Vnde so^elen ich vnde min vetter grafe Růdolf von Montfort dvnbropst^b) vnde phleger des gotzhuses ze Cur⁹ vnde min vorgenander brůider vnde voigt grafe Hug vnde vnser erbon des vorgenanden her Růdolfes von Roschach vnde siner erbon der vorgenanden gu^eter weren sin nach rehte, swa si es bedurfent an gaischelichem vnde an wetlichem^b) gerihte, vnde so^elen ouch in dv guter vertigen mit minen kinden, swenne si ze irn tagen komt^b). Vnde haben dar vm dem vorgenanden hern Růdolfe vnde sinen erbon ze ainer sicherhait vnde gewishait der vorgeschribenen werschaft vnde vertigvnge ze gisel gesetzet die erbern rittere hern Gotzwin von Nenzingen¹⁰ vnde hern Konratte von Richenstain¹¹, Sigelin von Richenstain, Gerunge von Notigenstain¹², Haynriche von Rancwil¹³ vnde V^elin Walthers. Vnde wer es, das es ze stose kern, das der vorgenande her Růdolf alder sin erbon der vorgenanden werschaft alder vertigungen bedorften, so son wir wem vnde vertigen, als vor geschriben stat, tette wir das niht, so sol er oder sine erbon, ob er enwere, die vorgenande gisel manon, vnde sont inen^c) die laisten ze Veltkirch¹⁴ in der stat in aines offenen wirtes huse, als sitlich vnde gewonlich ist, alle die wile in die vorgenanden gu^eter niht gevertiget sint, als vorgeschriben stat. Wer ouch, das der vorgenanden gisel dehainer abe giege^d) von dehainer schlahte sache, so sont wir ainen andern als gewissen gisel setzen an des stat inwendic ainem manode, tette wir das niht, so sol der vorgenande her Růdolf alder sine erbon die vorgeschriben gisel alle manon, vnde sont inen die laisten al die wile wir inen den gisel niht gesetzet vnde gegeben haben. Dirre dinge gezuge sint die erbem rittere her V^olrich von Empz¹⁵, her V^olrich von Nidegge¹⁶, her V^olrich von Montfort¹⁷, her Johannes von Bodeme¹⁸, her Haynrich von Schellenberg¹⁹, her Růdolf von Bludvnz²⁰ vnde ander erber lute genuge. Wir die vorgenande Sophie, grafe Růdolf vnde grafe Hug haben ouch gelobt, den vorgenanden giselen allen den schaden abe ze tvnde, den sie iemer gewinnent von der vorgeschriben giselschaft. Vnde das ditz alles stete vnde ane Widerrede belibe, so gib ich die vorgenande Sophie min insigel an disen brief vnde bitte die vorgenanden minen .. vetteren vnde mine .. voigte, das sie ouch ir insigel an disen brief geben ze ainem gewissen vnde wa^eren vrkunde der vorgeschribenen dinge. Wir grafe Růdolf vnde graf Hug von Montfort vnde her Swigger der Tvmbe die vorgenanden geben vnser insigel an disen brief durch der vorgenanden Sophien beten willen vnde ire kinde ze ainem gewissen vnde wa^erem vrkunde aller der dinge vnde gedinge, so hie vorgeschriben stant an disem briefe. Ditz beschach vnde wart dirre brief geben ze Veitkirch in der stat, do man von gottes geburte zalte drvizehenhundert jare, dar nach in dem sehszehendem jare, an dem frigetage nach sant Gregorien tage.

Source Fulltext: Chartularium Sangallense V, Nr. 2967, S. 302-304.