Allen^a) den, die disen brief ansehent lesent oder ho^erent lesen, kúnden wir die nâchgenemten V^olrich Eber||hart vnd V^olrich Johans von Sax¹ gebrůder vnd veriehent offenlich mit disem brieue fúr v´ns fúr || alle v´nser erben vnd nâchkomen von dez wingarten vnd hofstat wegen gelegen ze Rebstain² in dem || Rintal, den vns der erwirdig v´nser gna^ediger herre abt Geori abt dez gotzhus ze sant Gallen³ ze ainem rehten lipgedinge vnd in lipgedinges reht mit aller zv^o geho^erde, alz in Walther sa^elig von Englaberg⁴ ze ainem lipgedinge gehept vnd genossen hât, verlihen hat mit so^elicher beschaidenhait vnd in dem rehten, wenn wir baid ersterbent vnd ensint von todes wegen, daz dann der vorgeschriben wingart ze Rebstain mit hofstat vnd mit aller zv^o geho^erde dem vorgenanten v´nserm herren abt Georien vnd sinen nachkomen vnd dem vorgeschribenen gotzhus ze sant Gallen gantzlich ledig vnd lôs sint vnd sin sont vnd wider an sú genallen, also daz enkain v´nser erben noch nachkomen dannenhin daran noch darzů enhain reht vordrung noch ansprâch niemer mêr hant noch haben sont an gaistlichem noch an weltlichem geriht noch ân reht noch mit enkainer lay ander sache an alle geua^erde. Vnd ze vrkúnd der warhait aller der vorgeschribenen dinge vnd vergiht so habent wir die vorgenemten V^olrich Eberhart vnd V^olrich Johans von Sax gebrůder fúr v´ns fúr alle v´nser erben vnd nâchkomen vnserú insigel gehenkt an disen brief. Der geben ist ze sant Gallen an dem na^ehsten ma^entag nach sant Gerdrut tag in dem jâr, do von Cristus gebúrt wârent drúzehenhundert jâr, sibenzig jâr vnd darnach in dem sibenden jâre.

Source Fulltext: Chartularium Sangallense IX, Nr. 5572, S. 243-244.