Wir Karl von gotes gnaden Romischer keyser zu allen zeiten merer des reichs vnd kunig zu Beheim bekennen vnd tun kunt offenlich mit disem || brieue allen den, die yn sehent oder horent lesen, das wir durch ganze stete truwe, die wir zu allen zeiten an dem erwirdigen vnd geistlichen Herman || apte zu sant Gallen² vnserm vnd des reichs fursten vnd lieben andechtigen erfunden haben, ym vnd seinem gozhus vnd seinen nachkomen mit wol||bedachtem mute rechter wissen vnd keyserlicher mechte volkomenheit haben wir die sunderliche gnade getan vnd tun yn ouch mit crafft diz brieues, das er vnd sein nachkomen ewiclich bey allen seinen vnd des gozhus gutern friheiten vnd rechten beleiben sullen, vnd besunder das er vnd sein nachkomen statamman, rat zu sant Gallen, múnzmeister, zoll, brotschower, winschatzer, kornschatzer, den raiff vnd alle gewicht, das kornmess, das salzmess vnd das wynmess vnd den elnstab haben nyessen besetzen vnd entsetzen vnd ouch rechtuertigen sullen, als von alter recht vnd gewonlich gewesen ist doselbist in der stat zu sant Gallen vnd ouch zu Wil³ in der stat, es sey von seinen rechten oder gerichten, von twingen oder bennen, von zinsen, von stu^eren, von erb, von erbschafft, von empfahen, von erschetzen, von vellen, von gelessen vnd von des gozhus luten vnd gutern zu sant Gallen, zu Wil, zu Appozell⁴, zu Huntwille⁵, zu Vrna^eschen⁶, zu Tuffen⁷, zu Trogen⁸, in dem Ryntal⁹, in dem sunderampt¹⁰ oder wo sie gesessen seyn anderswo, es sey vff dem lande oder in vnsern vnd des reichs stetten oder in ander fursten vnd herren stetten, wo die ligen oder gelegen sein, an meniclichs hindernu^esse. Ouch von sunderlicher keyserlicher miltikeyt so meynen vnd wollen wir, wer das wir oder vnser vorfarn an dem reiche Romische keyser oder kunige vnsern vnd des reichs stetten oder ander fursten vnd herren stetten keynerley freyheyt vnd gnade gegeben hetten oder wir oder vnser nachkomen an dem riche sich vergessen, das wir yn die noch geben wurden, die da weren schedlich dem vorgenanten apte vnd seynem gozhus an luten oder an gut oder an keynen seynen rechten, wie man das erzelen kan, an alles geuerde, als sie das von alter hant herbracht vff dise zit, vnd wo das geschehe oder geschehen were wider diese obgenanten friheit vnd gnade, die in diesem vnserm brieue seyn, so nemen vnd tun wir sie ab mit rechter wissen vnd ouch keiserlicher mechte volkomenheit, vnd entscheyden lutern cleren vnd sprechen, das sie miteynander vnd besunder alle vnkrefftig vnd vntugelich sein sullen, vnd tun sie ab vnd vernichten sie auch genzlich vnd gar an allen yren begriffungen meynungen artikelen vnd puncten, wie sie dar komen seyn, an alles geuerde. Vnd ob yemant, wer der were, der also wider diese obgenanten vnser friheit vnd gnade freuelichen tete, der oder die sullen in vnser vnd des heiligen Romischen reichs swere vngnade vnd dorzu eyner rechten pene hundert pfunt lotiges goldes, als offte der dawider tut, verfallen sein, die halb in vnser vnd des reichs camer vnd das ander halbteyl dem obgenanten apte, sinen nachkomen vnd dem gozhus zu sant Gallen, die also vberfaren wurden, genzlich vnd an alles mynernusse sullen geuallen. Mit vrkund diz brieues versigelt mit vnserr keyserlichen maiestat ingesigel, der geben ist zu Prage^a) nach Crists geburte dreyzenhundert jar, dornach in dem drey vnd funffzigstem jare, an sant Michels tag, vnserr reiche in dem eynlifftem vnd des keysertums in dem andern jaren.

Source Fulltext: Chartularium Sangallense VII, Nr. 4449*, S. 295-296.