Allen den, die disen brief an sehend lesend oder ho^errend lesen, kúnd ich her Herman von der || Breitun Landenberg¹ ritter, das fúr min geriht ze Bischofcelle² in der stat kam fro Adilheid, || Hugs von Luterberg elichv´ wirten, vnd Vrsulla vnd Afra iro tohtran vnd da mit vrteild || vnd mit des vorgenanden Hvgs von Luterberg gunst vnd willen ein vogt namen, als inen vrteild vnd das reht gab, den erberen man Bilgri Hvgs burger ze Bischofcelle, vnd da sich dú vorgenand fro Adilheid vnd iro tohtran vnd ir erben vnzigen aller der rehtung vnd ansprach an geistlichem alder an weltlichem geriht, so sv´ gehaben mo^ehtin an disen lúten, Jvdentun der Milerin kind, dú etwen was V^olrich des Weibels von sant Johan elichv´ wirten, vnd Elizabeth iro swester vnd der kint, sú sien worden alder sú werden noch, dem erwirdigen herren von gottes ordnung abt Johans des gotzhvs ze sant Johan in Turtal vnd dem conuent gemeinlich vmb aht pfunt pfenning Kostenzer múntz, der wir gar vnd ganzlich gewert sint vnd in v´nsern nutz komen sint, vnd ze einem offen vrkúnd aller vorgescriben dingen so henk ich der vorgenand her Herman von der Breitun Landenberg ritter min eigen insigel an disen brief. Ich der vorgenand Bilgri Hvgs, der der vorgenanden fro Adilheid vnd iro tohtran vogt was v´ber die sach, fúrgich aller vorgescriben dingen, vnd ze merer sicherheid so henk ich min eigen insigel an disen brief. Der wart geben in der stat ze Bischofcella, do man zalt von gottes gebůrte drúzehen hvndert iar, dar nah in dem vier vnd vierzigostem iar, an der nehsten mitwchen nah der vfart.

Source Fulltext: Chartularium Sangallense VI, Nr. 3889, S. 437.