Wir graue Albreht der elter von Werdenberg vnd graue Albreht der junger von Werdenberg¹ sîn sun tůn kunt vnd verie||hen offenlich an disem brieue fúr v´ns vnd fur alle v´nser erben vnd nahkomen allen, die in ansehent, lesent oder ho^erent lesen, das wir mit || gůter vorbetrahtunge vnd beschaidenhait willeklichen gelobt haben mit gůten trúwen dem êrwirdigen herren von gottes gnaden abt || Herman des gotzhus ze sante Gallen², das wir im vnd sinen nahkomen ân allen fúrzug die vogtay des landes ze Appacelle³, ze Huntwile⁴, ze V^rna^eschen⁵, ze Túffen⁶, ze Wittabach⁷, ze Na^enggerswile⁸ vnd ze dem Rodmonten⁹, dú v´ns versetzet ist von dem riche¹⁰ vmb sehshundert march silbers Kostentzer gewiht, ze lo^esenne geben son vnd gâr vnd gantzlich ledig lâssen, wenne er ald sîn nahkomen v´ns gebent sehshundert march silbers Kostentzer gewiht. Wir veriehen ouch, das wir den vorgenemten abt Herman vnd sîn nahkomen fúrderren súlen ân alle geua^erde des besten so wir mugen gegen v´nserm herren kayser Ludwigen vnd gegen sinen nahkomen an dem rîche, wenne der selb abt Herman ald sin nahkomen die vorgenemten vogtygen von v´ns erlo^esent vmb sehshundert march silbers, das man sú im vnd sinen nahkomen versetze vmb sehshundert march silbers in allem dem rehte, als sú v´ns ietzo stânt von dem rîche. Wir veriehen ouch, das wir den vorgenemten abt Herman vnd alle sin nahkomen ân alle geua^erde súlin lassen bliben in allen den rehten vnd in allen den gewonhaiten gegen den vorbenemten lendern vnd ho^euen vnd gegen den lúten, die in die vorgenemten vogtygen geho^erent, da er vnd sin vordern vntz her inne beliben sint, vnd súlin sú darzů fúrderren vnd schirmen des besten so wir mugen ân alle geua^erde. Wir veriehen ouch, das wir dú vorgenemten lender vnd ho^eue vnd alle die lúte, die in die vorgenemten vogtygen geho^erent, súlin lassen blîben, alle die wîl sú von v´ns nút erlo^eset sint, mit stúran, mit diensten vnd mit allen gewonhaiten in allen den rehten vnd gewonhaiten, als sú das rîche vormâls liesse blîben vnd an v´ns braht hât. Vnd ze ainem wâren vrkúnde vnd ze ainer sta^etun sicherhait aller der vorgeschriben dinge vnd gedinge henken wir v´nsrú insigel fúr v´ns vnd fúr v´nser erben an disen brief. Der geben ward ze Altstetten¹¹ in der stat, do man zalte von gottes gebúrt drúzehenhundert jâr, viertzeg jâr, darnah in dem vierden jâre, an dem núnden tage nah inga^entem brâchod.

Source Fulltext: Chartularium Sangallense VI, Nr. 3892, S. 439-440.