Allen^a) den, die disen brief ansehent lesent oder ho^erent lesen, tůn ich V^olrich von Richenstain¹ kunt vnd vergich offenlich mit disem brief fúr mich vnd fúr alle min erben, das ich mit || gůter vorbetrahtung vnd beschaidenhait dis nachgeschoben lút Cůnraten von Vnderwasser², Růdolfen sinen brůder, Niclausen des selben Růdolfs elichen sun, Belun des selben Niclau||sen elichen tochter, V^olrichen, Růdolfen vnd Hainrichen an der Egge³ gebrůder vnd Ma^echthilten iro swo^ester, der vorgenemten Cůnratz vnd Růdolfs brůder kind, die || min reht aigen waren, mit lib mit gůt vnd mit allen rehten reht vnd redlich verkoft vnd ze koffenn geben hân dem erwirdigen herren abt Johansen von gottes verhengnúst abt des gotzhus ze sant Johann⁴ gelegen in Turtal sant Benedicten Ordens in Costenzer bisto^vm sinen nâchkomen vnd dem vorgeschoben gotzhus vmb sibenzig pfunt vnd zwai pfunt pfenning gůter Costenzer múns, der selben Pfenning ich gar vnd gantzlich von im gewert bin an den stetten, do ich minen frômen mit geschaffot hân, vnd hân och die vorgeschriben lút mit lib mit gůt vnd mit allen^b) dem vorgenemten herren abt Johansen vnd dem gotzhus ze sant Johânn vfgeben vnd geuertgot, als reht sitte vnd gewonlich was, vnd hân mich och darúber enzigen vnd enzih mich mit disem brief fúr mich vnd fúr alle min erben gen dem vorgenemten herren abt Johansen gen allen sinen nâchkomen vnd gen dem vorgeschriben gotzhus ze sant Johann aller aigenschaft aller lehenschaft aller manschaft aller gewer aller besatzung aller zúgnúst lút vnd brief alles rehten gaistlichs vnd weltlichs gerihtes aller vordrung vnd ansprach, so ich zů den vorgeschriben lúten zů ir lib ald zů ir gůt ald daran hatte oder iemer gewinnen mo^echt. Ich hab och gelobt fúr mich vnd fúr alle min erben, der vorgeschriben lút vnd des kofs wer ze sinn fúr aigen nâh reht gen menglichem, wa ald wenn sin der vorgenemt herre abt Johans sin nâchkomen ald das vorgeschriben gotzhus ze sant Johann ald die vorgeschriben lút bedurfent vnd notdurftig sint, ân geua^erd, Vnd ze offenem waren vrkúnd vnd sta^eten sicherhait aller diser vorgeschriben ding henk ich V^olrich von Richenstain da vorgenemt min insigel fúr mich vnd fúr alle min erben an disen brief. Der geben ist ze Costentz in dem iare, do man zalt von gottes gebúrt drúzehenhundert jar, sechzig iare vnd darnach in dem andern iare, an dem na^ehsten fritag vor sant Bartholomeus tag des zwelfbotten.

Source Fulltext: Chartularium Sangallense VIII, Nr. 4818, S. 36.