Allen den, die disen brief ansehent lesent oder ho^erent lesen, kúnden wir Burkart, Cůnrat, Hainrichwalther vnd Êberhart von Ramswag gebrůder, || hern Burkartz selgen sún von Ramswag¹, vnd veriehen dez offenlich an disem brief, won die burg ze Blatton², die von dem gotzhus ze sant || Gallen vnser recht burgsa^ess ist, vns daher vil jar mit gewalt vnd ân recht von grauen Albreht von Werdenberg³ vorbehept vnd ent||wert was, daz wir dauon dem vorgenemten gotzhus noch dez selben gotzhus a^ebten vnd phlegern mit der selben burg nicht gewarten noch getůn kůnden, alz wir billich solten, ob wir die selben burg inne gehept hettint, vnd won vns die selb burg mit gottes helff in worden ist vnd vns der erwirdig vnser gena^ediger hêrr abt Geori abt⁴ des vorgenemten gotzhus von gnâden die selben burg ze ainem rechten burgsa^ess empholhen hât, darumbe so haben wir dem selben vnserm herren abt Georien willeklich gesworn vnser ieliche sunderlich ainen gelerten aid ze den hailgen mit v^f gehabenen vingern, daz wir dem selben abt Georien vnd sinen nachkomen mit der vorgenemten burg gen menlichem getrúlich warten sullent vnd den selben abt Georien vnd alle, die mit im koment vnd die er dar sendet, in die selben burg vnd darûs lâssen súllent ze schimpf vnd ze ernst, wenn vnd wie dik vnd weler zît der egenemt abt Geori daz vordrot vnd wil, selb oder mit sinen brieuen, ân allen fúrzug vnd wider red. Daz selb súllen wir o^vch sinen nachkomen, ob en enwa^er, tůn vnd laisten ân all geua^erd. Vnd darúber ze merer sicherhait der vorgeschriben ding so henken wir die vorgenemten Burkart, Cůnrat, Hainrichwalther vnd Eberhart von Ramswag gebrůder vnsrú insigel an disen brief. Der geben ist ze Appacell⁵ an dem na^ehsten mentag nach sant Pelaien tag in dem jar, do man zalt von Cristus gebúrt drúzehenhundert jar vnd darnach in zwai vnd sehszigosten jar.

Source Fulltext: Chartularium Sangallense VIII, Nr. 4819, S. 36-37.