In^b) deme namen vnsers herren Iesu Christi amen. Wir WilIm. von gotes gnaden der abbet¹ ze sante Gallin kunden allen den, die || dise gegenwrtigen hantvesti iemir ane gesehint alde ho^erent lesin, aine rehtun gelo^vbsami allir der dinge, so dar ane geschriben stat. || Ir sulent allesament wissen fur war, daz wir ane hant gesehen mit iemir wernden triwen die grozzen liebi, die vnser getriwer || vriunt, der vrie herre herre Ebirhart von Burgelon² an vns mit starkime vnde^c) getriweme dienste gelait hat, vnde alliv div phender, div wir ime gesezzit hatton vmbe ahzig marche vnde vnser vorvare dir abbet Rv^omo³ vmbe zwainzig. Die zwaing^d) marche zellen wir zv^o den ahzigen, daz werdent hundert marche, vnde also bestaeten wir die zwainzig in phandes wis zv^o den vorgenanten ahzigen alles lo^etiges silbers, vnde swie div phender namen hant, div wehseln wir ime mit gv^otem willen, vnde haben dem selben hern Eber. vnde sinen erbon fur vns vnde fur vnser nachkomen versezzit Hvttinswiller⁴ vnde Blaikon⁵ vnsers gotshus hove, baidiv livte vnde gv^ot, mit allime rehte, wan allaine vaelle vnde erbe, div zwai haben wir vns selben behalten zainer kantnuste der aygenscheften. Dise ho^eve haben wir ime vnde sinen erbon versezzit mit deme gedinge fur vns vnde fur alle vnser nakomen, daz dir herre Eber. baidiv livte vnde gv^ot der vorgenanten ho^eve ane vaelle vnde erbe, div mit namen sunderbaerlichen vs genomen sint, haben sulent alse lange, vnz daz wir alde vnser nakomen dim hern Eber. vnde sinen erbon die vorgenanten hundert marche vnvergolten haben, vnde dc wir alde vnser nakomen hie nach, so wir lo^esin wolten, it gesprechen mugen, daz sich dise livte von Hvttinswille vnde von Blaikon irlo^esit haben mit deme nuzze, so der herre Eber. vnde sine erben vs den ho^even vnde abe den livten genomen haben, dc wir die selben anesprache verkomen mit gv^oten triwen, dar vmbe so geben wir ime vnde sinen erbon vmbe sinen getriwen dienst fur vns vnde fur alle vnser nakomen allen den nuz, den er alde sine erben in genomen hant vnz an den tag, de wir alde vnsir nakomen dc selbe livte vnde gvt irlo^esint mit den hundert marchen silbers, vnde dc wir dim hern Eber. vnde sinen erbon iemer mer staete haben vnde niemer mit nivtiv gebrechen, swaz an dierre hantvesti gescriben stat, dar vmbe so verzihen wir vns alles rehtes gaistliches vnde weltliches, brieve von Rome aide anderswannan, die gewnnen sint alde man noch gewinnen mag, vnde kurzlichen allis des rehtes vnde der liste vnde hilfe, von der disiv gegenwrtige hantvesti ir craft verliesin konde oder mo^ehte. Ich herre Eber. von Burgelon verzihe mich o^vch mit namen an dierre gegenwrtigen hantvesti, ane div vorgenanten phant ze Huttinswiller vnde ze Blaikon, aller der phande, swie div namen hant, so ich vnz an disin hivtigen tag han gehobit von minem herren abbet Willm. vnde sinen vorvarn allvnsamint. Vnde vmbe aine staeten vnde ewigen craft allir der dinge, so da vor gescriben stat, so hant wir fvr vns vnde alle vnsir nakomen dim hern Eber. von Burgelon vnde sinen erbon gegeben dise hantvesti besigilt mit vnsirme isigel. Ich herre Eber. von Burgelon zainime vrkunde ainir verzigenuste der phande, als da vor gescriben stat, henke o^vch min isigel an disen brief. Dis beschach ze sante Gallin, do man zalte von gotes geburte M°CC°LXXXX°III°. jare in deme dritten jare^e), an vnsirre vrowen tage ze mitteme herbeste, dem man da sprichet der geburtliche tag vnserre vrowen, in der sehsten indiciun, da ze gegene waren dise geciuge: graue Rud. vnde graue Hug die gebrůder von Montfort⁶, herre Hain. von Griezzenberg⁷, herre Rud. von Rorschach⁸, herre Hain. der vogit von Wartense⁹, herre C. von Gloton¹⁰, herre Rud. der kilichherre von Rorschach¹¹, C. dir Camerer, Egel. vnde Egel. sin brůder von Rosenbvrch¹² vnde ich maister Berht. der schriber¹³ vnde ander erbaere livte genv^oge.

Source Fulltext: Chartularium Sangallense IV, Nr. 2319, S. 416-417.