Allen, die disen brief ansehent oder ho^erent lesen, kúnde ich Gudentz von Hofstetten sesshaft vf Tu^ebelstein² vnd vergich offenlich || an disem brief fúr mich vnd fúr alle min erben, die ich nu vnd hie nache vestenkliche hier zů binde, das ich mit || wolbedachtem můte vnd nach rate recht vnd redlich zů eim bestetten ewigen ko^vffe ze ko^vffenne geben han || vnd gibe mit disem brief dem erwirdigen wisen geistlichen herren abte Heinrich vnd sinem gotzhus ze sant Johanne³ sant Benedicten orden in Costentzer bistům gelegen in sant Johanner tale⁴, des ersten so habe ich inen ze ko^vffenne geben fron Katherinen Heinrichs Hofmans von Schmerikon⁵ elichú wirtin, vnd dar nach so habe ich inen ze ko^vffen geben o^vch dem egenanten abte vnd sinem gotzhus Ru^edgern, Cůnrat, Berchtolt, Hansen vnd Ru^edin der egenanten Katherinen elich súne, du ellú sechse von dem libe min eigen vntz her gewesen sint, vnd entzihe mich o^vch fúr mich vnd mit namen fúr alle min erben nu vnd hie nach aller eigenschaft gewaltes rechtunge vordrunge vnd ansprache, so ich zů der egenanten Katherinen vnd ir súnen von eigenschaft ald von deheiner leye ander sach wegen ie gehatte mit geistlichen ald mit weltlichen gerichten ald ane gericht, vnd loben o^vch mit gůten trúwen fúr mich vnd min erben, der egenanten Katherinen vnd aller ir súnen, als sú vorben(empt) sint, recht were ze sinne nacht^a) recht, wenne sin der egenant abte Heinrich ald sin gotzhus des notdúrftig sint vnd des bedurfent, ane alle geuerde. Vnd dar vmb so han ich Gudentz von Hofstetten in eins rechten ko^vfs wise empfangen von dem obgenanten abte Heinrich vnd von sinem gotzhus viertzig pfunt pfenning Zúricher múntz genger vnd genemer, der ich gentzlich von inen gewert bin vnd in minem^a) gůten nutz koment sint nach miner vergicht. Vnd des ze einem waren vrkúnde vnd gantzer sicherheit so han ich Gudentz von Hofstetten min eigen insigel offenlich gehenkt an disen brief fúr mich vnd alle min erben. Dirre brief ist geben an dem mentag nach v´nser fro^vwen tag ze mittem o^vgsten in dem jar, do man zalt von gottes gebúrt drúzehenhundert vnd fúnf vnd sibentzig jare.

Source Fulltext: Chartularium Sangallense IX, Nr. 5469, S. 139.