Ich V^olrich Faisli kúnd vnd vergich offenlich an disem brief, das ich han geben ze koufen recht vnd redlich immer me ze || rechtem aigen Albern Faislin vnd sinen erben allú gemain, dú ich mit im hatt vnd min was, di^e da gelegen ist an || den gůtern^a), das da haiset Marein¹, vnd die gemain, di^e ich hatte an dem berg, der da gelegen ist vor Alber Faislins hus, || vnd han im das ze koufen geben ze rechtem aigen vmb sechs phunt phennig Costenzer múns, vnd sol der vorgescriben gůter sin wer sin vnd siner erben an allen den stetten, da sú sin notdurftig sint, es si an gaischilich oder an weltlichen gerichten. Vnd was an dem kouf Hans von Trisen², Cůnrade Gansar, Gerung der Jeger, Beter von Vilters³, Hainz der Sulser, Hainz von Quadren. Ich der vorgenante Vlrich han ouch dis getan mit aller miner erben wissen vnd gunst vnd mit verhengnusse vnd mit willen. Vnd zů ainer offen warhait diser vorgescriben ding vnd geding, so von mir an disem brief gescriben ist, so gib ich der vorgenante V^olrich Faisli dem vorgenanten Albern Faislin vnd sinen erben disen brief besigelt mit minem aigen ynsigel. Der geben wart ze Velkilch⁴ in der stat, do man zalt von gottes gebúrt drúzehenhundert iar, dar nach in dem achtodem vnd drisigostem iar, an sant Johans abent ze sunwendi.

Source Fulltext: Chartularium Sangallense VI, Nr. 3690, S. 281-282.