Wir Hainrich von gottes gnaden abit des gotzhus ze sant Gallun¹, daz da gelegen ist in Kostentzer bistv^om, kvnden allen den, die disen brief an sehent oder ho^erent lesen, || daz wir de^a) edeln herren grauen Krafte von Toggenburg probist ze Zvrich vnd tv^omhere des kores ze Kostentz² durch den dienst, den er vns vnd vnserm gotzhus diche nutz||lich hat getan vnd noch tv^on sol vnd wil, mit gemeinem rate gvnst vnd willen des probistes, des tegans, des portners, des custers vnd aller der herron des conuen||tes vnsers gotzhus gelobt haben mit aller der gelvbde worton vnd handen, die vns vnt vnser gotzhus vnd o^vch vnser nachkomen gebinden mag, zegebenne hundert mark lo^etiges vnd gv^otes silbers dez geweges ze Kostentz, vnd wan wir im nit hatten zegeben in hendes die selben hundert mark silbers, so haben wir im darvmbe mit der vor genanton probistes, tegans, porteners, custers vnd allers^a) vnsers conuentes gvnst vnd willen vmb die selben hundert mark silbers gesezet ze ainem rechten vnd ze ainem gewerren phande den hof vnsers gotzhus, de^a) da ze Stamhain³ gelegen ist, mit lute, mit gv^ot, mit gelte, mit vellen, mit erschetzen, mit erbe, mit gewalt ze besetzenne vnd ze vntsetzenne, mit twing, mit banne, mit gericht, mit dem kilchensatze ze Stamhain, also de er ald sin erben ald swem er der vorgenanten phantschaze beterminot ald schaffet mit gesvndem libe oder mit siechem, ob er ioch, da vor got sîe, an sinem totbette lege, gewalt haben die kilchen ze Stamhain ze lihenne, swenne ald swie dik si ledig wirt, e wir ald vnseru nachkomen im ald sinen erben ald den, den er den phantschatz beterminot, als da vorgeschriben stat, die vorgenanten hundert mark lo^etiges silbers Kostentzer geweges gar vnd ganzlich vergelten. Swaz o^vch der selbe graue Kraft von Toggenburg, sin erben oder die, den er den phantschatz beterminot, hinnan hin iemerme geniessent an gelte, an zinsen, an vellen, an erschazen, an luten oder an gv^ote von dem selben hofe ze Stamhain ald den gv^etern ald lvten, so dar zv^o ho^erret, daz sol im noch sinen erben an dem vor genanten ho^vbtgv^ote der hundert mark nit abe gan noch abe geslagen werden, wan daz geben wir im vnd inen willeklich vnd vrilich vor allen dingen fvr ain recht gabe, âne die vorgenanten hundert mark, vmb den nvzeklichen dienst, den er vntz her vnserm gotzhus getan het vnd noch tv^on wil. Vnd daz alles daz, das da vor geschriben stat, stete vnd ganz belibe, so enzvhen wir vns vnd die vor genanten herren vnsers conuentes von sant Gallen vnd o^vch aller der convent an disem gegenwurtigem brief fvr vns vnd fur vnser gotzhus vnd o^vch fvr^b) vnser nachkomen aller der ansprach an geischlichem ald an weltlichem gerichte, aller der brief, die wir haben ald die wir mochten gewinnen ze Rome, ze Megentz⁴, ze Kostentz von dem bistv^om, von kaiser oder von kvnge, vnd aller der gew^onhait landes oder lantgerichtes, da mitte der vor genante phantschatz bekrenket ald gesweket mo^echte werden mit Worten oder mit werken. Vnd ze ainer ewiger vestnug^a) aller der dinge, so da vor geschriben stant, so gib ich der vorgenante graue Kraft disen gegenwurtigen brief besigelt mit minem ingesigel ze behalten alles daz, daz da vor geschriben stat. Diz beschach ze Wil⁵ in der stat, do man zalt von gotz gebvrte drvzehenhundert jar vnd dar nach in dem fvnfzehenden jare, an dem nechsten dunrstage vor sant Mathyas tag des zwelbotten^a).

Source Fulltext: Chartularium Sangallense V, Nr. 2916, S. 272-273.