Wir Ludowig von gotes genaden Ro^emischer keiser ze allen zeiten merer des reichs bechennen offenlichen mit disem || brief, das wir dem erwirdigen geistlichen manne Hermannen abbt ze sant Gallen¹ vnserm lieben ffúrsten vnd sinen nach|| komen die vogtey ze Appazelle², Huntwil³, Tiuffen⁴, Vrnaschen⁵, Wittewach^a)6, Naengerswiler⁷ vnd ze dem Rodmunt⁸ v´ber lúte || vnd v´ber gůt, die darzv^o vnd darin geho^erent, versetzt haben fúr sehs hundert mark silbers Kostenzer gewigds, dar vmb er die selben vogtay von graf Albrehten von Werdenberg⁹, die wir im vmb die selben sehs hundert mark silbers versetzt heten, erledigt vnd erlo^ezt hat¹⁰. Darzv^o haben wir im geben sehs hundert mark silbers durch der dienst willen, die er vns vnd dem reiche getan hat vnd auch fúrbaz tůn sol, vnd besunderlich das er vns warten vnd dienen sol mit leibe vnd mit gůt vnd mit sinen vesten, vnd mit namen sol er vns beholfen sein mit den vesten Blatten¹¹ vnd Bernanch¹² den krieg gen Kúrwalhen¹³, mit der bescheidenhait, swenn sich vnser lantuogt oder ieman anders von vnsern wegen gen dem selben krieg setzzet, so sol sich der vorgenant abbt mit zwainzig mannen mit helmen auch da hin setzzen vnd vns dienen. Wúrden wir auch deheinerley gesezze ze Kurwalhen haben, so sol vns der vorgenant abbt oder sein nachkomen mit aller siner maht beholfen sein. Wa^er auch, das der krieg gen Kurwalhen verriht wúrde, so sol er vns vnd vnsern kinden dannoch dienen vnd warten driv gantziv iare darnach in dem lande mit aller siner maht, ob wir als lang leben. Vnd die selben sehs hundert mark silbers haben wir im geslagen vf die vorgeschribenn pfand vnd vogtei, also das der obgenant abbt Herman vnd sein nachkomen div selben pfant vnd vogtei mit allen rehten, eren, diensten, nu^etzzen vnd gúlten, die darzv^o geho^erent, innhaben vnd niezzen súllent als ir rehtes pfant, als lange, bis das wir oder vnser nachkomen an dem reiche kv´nig oder keiser die selben vogtay vmb die vorgeschriben zwelfhundert mark silbers Costenzer gewigds gentzlichen vnd gar erledigen vnd erlo^ezen. Vnd darúber ze vrchúnde geben wir im mit vnserm keiserlichen insigel versigelten disen brief. Der geben ist ze Mu^enchen an sant Walpurg tag, nach Cristes gebu^ert driuzehnhundert iar, darnach in dem fúmfe vnd vierzigsten iare, in dem ainen vnd dreizzigsten iare vnsers reichs vnd in dem ahtzehenden des keisertůms.

Source Fulltext: Chartularium Sangallense VI, Nr. 3921, S. 469-370.