Wir Herman von gottes vnd des stůls gnaden ze Rôme besta^eter abt des gotzhus ze || sante Gallen¹ kúnden vnd veriehen offenlich an disem brieue fur v´ns vnd fur alle v´nser nahkomen || allen, die in ansehent, lesent oder ho^erent lesen, das die ersamen lút die vndertan der kilchun || ze Swartzenbach², dú von v´ns vnd von v´nserm gotzhus lehen ist, mit v´nserm gunst vnd willen gezwiget hant nussebome bi der vorgenemtun kilchun, vnd habent můt fúrbas ze zwygenne so^elich bôme in dem kilchoue der selbun kilchun dur das, das dú selb kilche gotte ze lobe vnd ze êren deste bas belúhtet werd, also was frúhte vnd was nútze von den bômen, die ietzo da stânt oder noch da gezwyget werdent, iemer bekumet ald werden mag, die son die kilchmayier der selbun kilchun bekêren in der selbun kilchun ze Swartzenbach liehtes nutz, als sú sich versehent bi ir êren vnd ouch bi ir wârhait, das es dem liehte der selbun kilchun aller nutzberest si, es si das man die nusse, die vffen den selben bômen gewahssent, ze o^ele mache oder das man die nusse verko^vffe vnd damit, das man dauon lo^eset, o^ele koffe, als verre die nusse nah werde gelangen mugen nah der jâr zit vnd ouch nah gemainem koffe. Ouch son die kilchmayier der vorgenantun kilchun beschirmen vnd fúrbas bringen die selben bome mit v´nser vnd v´nser nahkomen vnd der vndertan hilfe, die wir darzů binden, dur das, das dú vorgenant kilche, als verre der vorgenanten nussebome nutz vnd fruht gelangen mag, eweklich belúhtet vnd beliehtet werde³. Vnd ze ainem wâren vrkúnd vnd ze ainer sta^etun sicherhait der selben dinge henken wir v´nser insigel an disen brief. Der geben wart ze sante Gallen in der stat, do man zalt von gottes geburt drúzehenhundert jâr, darnah in dem sehsvnddrissegosten jâr, an sant Katherinun abent.

Source Fulltext: Chartularium Sangallense VI, Nr. 3640, S. 246.