Wir^a) Geori von gottes gnâden abt¹ vnd daz cappittel gemainlich dez gotzhus ze sant Gallen tu^en kunt vnd veriehent offenlich mit disem brieue || fúr vns vnd fúr alle vnser nâchkomen allen den, die disen brief ansehent lesent oder ho^erent lesen, sid Burkart von Ramswâg² sin gnâd beschai||denhait vnd tugent gen vns vnd vnserm vorbenemten gotzhus getân vnd vollefu^ert hât mit dem vnd an dem, daz er mit gůter beschaidenhait vnd || vorbetrahtung sinen halbtail des kelnhofes vnd kylchunsatz ze Waltkilch³ vnd o^vch sinen tail der gu^eter nútz zins vnd stúran vnd o^vch sinen tail aller der lúte, die lút vnd gu^eter in sinen tail dez vorgenanten kelnhofes geho^erent, vnd o^vch die múlinan vnd blúwel ze Waltkylch vnd in Hasenberg⁴ mit allen rehten nútzzen vnd zinsen, die zů denen múlinan vnd blúweln geho^erent ald darin, vns vnd vnserm vorgenanten gotzhus vnd vnseren nâchkomen ledklich gar vnd gantzlich frilich v^f geben hât an vnser vorgenant gotzhus⁵, darumb habent wir vorbenemter abt Geori vnd gemainlich daz cappittel dez vorbenemten gotzhûs dez selben Burkartz von Ramswâg beschaidenhait gnâd vnd tugent an gesehen vnd habent im vnd Cůnrt V^olrichen vnd Burkart Dietrich sinen êlichen súnen⁶, die er hât bi Gůtun siner êlichen wirtinnen von Montfort⁷, mit gůter vorbetrahtung vnd mit gemainem rât vnsers cappittels inen allen drin gemainlich ze lîpding vnd in lîpdinges reht geben vsser disen nâchgeschribenen gu^etern mit der bedingde vnd beschaidenhait, daz Burkart von Ramswâg, die wîl er lebt, daz nâchgeschriben lîpding kernen haber pfenning hu^enre vnd ayger gelt alleklich vnd gar in nemen haben vnd niessen sol âne allen fúrzug, vnd wenn er enist vnd ab erstirbet, so sol daz selb kernen haber pfenning hu^enr vnd ayger gelt alleklich vallen an sine vorbenemten súne baide ald, ob iro ainer ab ersturbi, an den andern, der danne lebet, ze rehtem lîpding, vnd sol er vnd nâch sinem tode sine vorbenemten súne baide ald wela dann vnder inen lebet daz nâchgeschriben kernen haber pfenning ayger vnd hu^enr gelt ja^erlich vff sant Martis tag gar vnd gantzlich vnd ru^eweklich hân niessen vnd in nemen âne alle sûmsa^eli vnd bekrenknust vnser vnd vnser nâchkomen mit allen den rehten vnd gewonhaiten, als wir vnd vnser gotzhus zů den selben gu^etern vnd zinsen habent vnd han so^ellint von reht ald von gewonhait. Vnd sint diz dú gu^eter nútz zins vnd lîpding, von der kylchun ze Kylchberg⁸ siben pfunt pfenning gůter vnd gena^emer Costentzzer múnse, vsser dem kelnhof ze Húttiswîlle⁹ sechs pfunt pfenning der selben múnse, zwai hundert ayger vnd vier vnd zwainzig hu^enre, vsser dem kelnhof ze Rumanshorn¹⁰ sibenzehen scheffel vnd zwai viertail kernen, ainlúf malter haber, vsser dem kelnhof ze Gosso^vw¹¹ sehszehen scheffel kernen vnd vsser dem hof ze Mos¹² sechs scheffel kernen alles gůtes vnd gena^emes sant Galler messes ja^erliches geltes, vnd sont o^vch die hindersa^etzzen vnd bûwlút, die dann dú gu^eter buwent vnd inne hant, dem vorgenemten Burkarten von Ramswag, Cůnrat V^olrichen vnd Burkart Dietrichen sinen vorbenemten súnen inen allen drin ald wele dann vnder inen lebet, daz vorgeschriben lîpding kernen haber pfenning ayger vnd hu^enr gelt ja^erklich gar vnd gantzlich geben vertgen vnd antwúrten in diz nâchgeschribenen stette, daz gelt von Rumanshorn, von Húttiswille vnd von Gosso^vw gen sant Gallen oder gen Byschoffcelle¹³, in wedri der selben stett ain vnd in weles hûs, da der selb Burkart ald, ob er enwa^er, sin vorbenemten sún denn went, ân allen schaden dez selben Burkartz vnd siner sún, vnd daz gelt von Kylchberg vnd von Mos sont die hindersa^etzzen vnd buwlút ja^erlich vertgen vnd antwúrten gen Wîl¹⁴ in die stat, in weles hûs dann Burkart von Ramswâg ald, ob er enwa^er, sin sún went. Ta^etint dez die hindersa^etzzen vnd buwlút niht, so hât Burkart von Ramswâg vnd sin vorbenemten sún vollen gewalt reht vnd friges vrlob, die hindersa^etzzen vnd buwlút vmb daz vorgeschriben gelt vnd lîpding ze no^etenn ze pfendenn vnd an ze griffenn mit geriht ald ân geriht in allem dem rehten vnd gewonhaiten, als wir vnd vnser gotzhus reht vnd gewonhait habent, vmb die selben vnd vmb ander vnser zins ze no^etenn ze pfendenn vnd an ze griffenn. Wûrdint aber Burkart von Ramswag ald, ob er enwa^er, sin sún baid oder wele dann vnder inen lebet von vns ald von vnseren nâchkomen an iro vorgeschribenen lîpding vnd gelt an korn pfenningen aygern ald hu^enren dehaines jâres bekúmbert bekrenket oder gesûmet in dehainen weg ald in dehain wis, also daz sú iro vorgeschribenen lîpdinges vnd zins da von vss la^egint vnd niht gar vnd gantzlich gewert vnd v^sgeriht wûrdint vff sant Martis tag, so hât der selb Burkart von Ramswag vnd sin vorbenemten sún alle drie ald wele dann vnder inen lebet vnd iro helffer ie nâch sant Martis tag, wenn sú wellent, vollen gewalt vnd friges vrlob von v´ns vnd v´nseren nâchkomen, v´ns vnd v´nser gotzhus ze no^etenn ze pfendenn vnd an ze griffenn an v´nseren lúten vnd gu^etern, ân an v´nsern closterlehenn, vff dem land ald in den stetten, wâ oder wie ald wenn sú went, mit geriht ald ân geriht ân alle klag vnd ân alle wider red v´nser vnd v´nser nâchkomen, vntz daz sú ie iro vorgeschribenen lîpdinges vnd zinse alleklich gewert vnd v^sgeriht werdent. Vnd wie Burkart von Ramswâg als^b) sin vorbenemten sún vnd iro helffer von dez no^etens pfendens vnd an griffens wegen in dehainen weg ald in dehain wîs ze redlichem schaden koment, da von súllent wir vnd v´nser nâchkomen sú ân allen fúrzug gar vnd gantzlich ledgen vnd lo^esen, vnd sol v´ns noch v´nsers vorbenemten gotzhus lút noch gůt da vor niht schirmen weder geriht gaistlichs noch weltlichs noch kainer hand v^szug. Wir habent o^vch mit gemainem rât vnsers cappittels dem selben Burkart von Ramswag vnd sinen vorbenemten súnen die gnâd getân vnd habent inen den kylchensatz halben ze Waltkylch willeklich geben ze rehtem lîpding, also daz sú die kylchun halb ze Waltkylch lihen sont vnd mugent, wem sú wellent, ân alle bekrenknust vnser vnd vnser nâchkomen, vnd wenn Burkart von Ramswâg, Cůnrat V^olrich vnd Burkart Dietrich sin vorbenemten sún alle driie ab ersterbent, so ist vns vnd vnserm vorbenemten gotzhus daz vorgeschriben lîpding vnd zins vnd o^vch der vorgeschriben kylchensatz halbe ân allen fúrzug vnd wider red alleklich vnd gar ledig vnd lôs, also daz dehain ir erben noch nâchkomen daran noch darzů niemer dehain ansprâch reht noch vordrung han noch hie nâch gewinnen sont. Vnd ze ainem wâren vrkúnde vnd ze ainer sta^eten sicherhait aller diser vorgeschribenen dinge henken wir vorbenemter abt Geori vnser vnd vnsers cappittels insigel an disen brief. Der geben ist ze sant Gallen in vnserm closter an sant Andres tag dez zwelfbotten in dem jâr, do man zalt von gottes gebúrt drúzehenhundert jâr vnd dar nach in dem ain vnd sehszigosten jâre.

Source Fulltext: Chartularium Sangallense VII, Nr. 4771, S. 575-577.