Allen den, die disen brief ansehent lesent oder ho^erent lesen, kúnd ich Burkart von Ramswâg¹ hern Burkartz sa^elgen von Ramswâg² êlicher sun vnd vergich dez offenlich || an disem brief fúr mich vnd alle min erben, won ich mich dez vil vnd dik mit gůter vorbetrahtung erkande, daz daz gotzhus ze sant Gallen den halbentail dez kelnhoues || vnd dez kylchensatzzes der kylchen ze Waltkilch³ vnd alle die lúte vnd gu^eter, so in den selben vnd zů dem selben halben kelnhof vnd kylchensatz geho^erent, als hie nâch ge||schriben stât, der selb kelnhof vnd kylchensatz halbe mit allen den lúten vnd gu^etern, so darin vnd darzů geho^erent, mir ze tail wûrdent von minen brůdern nach dez êgenemten mines vatters sa^elgen tode, billicher inne haben vnd niessen so^elt dann ich ald min erben von dez wegen, daz dú burg ze Blattun⁴, die min vatter sa^elig mit dem kelnhof vnd kylchensatz ze Waltkilch mit aller zů geho^erde von dem gotzhus ze sant Gallen ze rechtem burgsa^ess hatt, vnd die selb burg bi dez selben mines vatters sa^elgen ziten vnd von sinen wegen dem êgenemten gotzhus empfro^emt vnd vsser siner gewaltsami braht wârd, daran vnd da von dem êgenemten gotzhus grôsser vnd swârlicher schad vnd gebrest beschach vnd v^f gelo^vffen ist, darumb so kam ich mit gesundem libe vnd mit gůter vorbetrahtung gen sant Gallen fúr den êrwirdigen fúrsten minen gna^edigen herren abt Georien abt dez gotzhus ze sant Gallen⁵, vnd fúr den selben schaden, als verr ich in widern solt, vnd luterlich durch got vnd durch miner sêl vnd miner vordern selan hail vnd trôst willen liess ich dem êgenemten abt Georien ledig vnd gab im v^f willeklich vnd frilich gantzlich vnd ledklich ze rechtem aigen an dez vorgenemten gotzhus stat vnd ze dez selben gotzhus handen fúr mich vnd alle min erben den vorgeschribenen kelnhof vnd kylchensatz halben vnd dú múli, die man nemmet im Hasenberg⁶, vnd die múli vnd die blúwel ze Waltkilch gelegen vnd diz nâchgenemten lút vnd gu^eter vnd darzů alle die lút vnd gu^eter reht nútz êhafti vnd rehtung mit akkern mit wisan mit holtz mit veld mit wasen mit zwi mit waidan mit wegen mit stegen mit wasser vnd mit wasser gengen vnd mit allen rehten vnd gewonhaiten, so zů dem vorgenemten kelnhof vnd kylchensatz halben vnd o^vch zů den vorgenemten múlinan vnd blúweln vnd zů den nâchgenemten lúten vnd gu^etern ald darin geho^erent, sú sient benemt ald vnbenemt, gesůcht ald vngesůcht, wissent oder verborgen, also han ich ez alles dem êgenemten abt Georien an dez vorgenemten gotzhus stat gantzlich v^f geben vnd ledig gelâssen fúr mich vnd alle min erben. Vnd sint daz die benemten lúte Ru^edi am Werd⁷, Ma^etzzinun der Sta^ehellinun kint drú, Cu^eni Dierslihůber sin wip vnd irú kint, Hans Zwikker sin wip vnd sinú kint, Cu^eni zer Tannun⁷, Wa^elti, Peter, A^elli vnd Grêt sinú vnd dero kint, Albreht Zwikker vnd sin wip, Cu^eni Zwikker, Elsi Tierlishůbers swester vnd irú geswústergit vnd Ru^edi ir man, Cu^eni Nisi von Loch⁸, Růdolf Gebhartz vnd sin sun, Vinsel Ma^etzzi, Schindolf vnd sin wip vnd sinú kint, Hans Sprung vnd sin wip, der alt Hainrich Keller von Waltkilch vnd sin wip, A^elli Braitenma^ennin vnd V^eli ir sun, der Kegel vnd sin wip, Haini Sunderwint sin wip vnd ir tohtren vnd Grêt siner swester tohter, Gret Inwans vnd ir tohter, Peter Sigerst sin wip vnd Hans sin brůder, Hansen wip von Ahe⁷, Eberli Braitenman, V^eli von Loch vnd sin tohter, Wa^elti dez Vorsters tohterman Grêt sin wip vnd ir kint, Hans von Loch sin wip vnd irú kint, Růtlieb vnd sin wip, Eberli Schnider vnd sin wip, dú Schoppin selb fúnft, dú Lo^efflerin selb dritt, Cristans tohter, A^elli Spilma^ennin von Ainwîlle⁹, V^eli Geriner, V^eli an der Staig¹⁰ sin wip vnd irú kint, Ru^edi von Schachen¹¹, Ru^edi dez Sprungs brůder, Ma^etzzi Weberin, dú Scha^vffhuserin vnd ir sun, Hans Vorster vnd sin wip, Katherin Cu^eni des Cramers tohter, Wilhelm Keller vnd sin wip, Johans vnd Johans, Grêt, Vrsull, Adelhait vnd Wilhelm irú kint vnd Els dez jungen Wilhelms wip, Elsi Cristans tohter von Blaikenbach¹², vnd Haini dez Kellers sun von Waltkilch sin wip vnd sinú kint. So sint daz dú benemten gu^eter, der wald halbe in Honuirst¹³, der stadel mit der hofstat vff dem kelnhof ze Waltkilch, dú Tierlishůb¹⁴, dú hůb ze Honuirst, dez Bolers hůb, der hof zer Tannun⁷, dez Kellers hůb ze Niderwille¹⁵, daz Brugglehen⁷, Růdis hofstat am Wêrd, dez Mesners gu^eter, Hans dez Vorsters gu^eter, dú Egerde¹⁶, daz Sundrig Gerút¹⁷ vnd dú Schůppůss¹⁸, Cůntzzen gůt ab Staig, dú Staigschůppůss, daz gůt zem Stainkelr⁷, daz gůt ze Schachen, dú Widenhůb¹⁹, der bongart vor der burg. Darúber so han ich fúr mich vnd alle min erben dem êgenemten abt Georien gelobt mit miner trúwe, daz ich vnd min erben dez selben abt Georien siner nachkomen vnd dez gotzhus ze sant Gallen vmb alle die vorgenemten lút vnd gu^eter vnd vmb alles daz, so darzů geho^eret, ez sie benemt ald vnbenemt, als vorgeschriben stât, recht wern súllent sin nâch reht gen ma^enlichem, da sie darumb vmb alles oder vmb dehaines sunderlich angesprochen oder v^fgetriben wûrdent mit dem rehten an gaistlichem ald an weltlichem geriht oder an dehainen stetten. Vnd sol ich vnd min erben, ob ich enwa^er, daz tůn ân allen fúrzug vnd ân allen dez êgenemten abt Georien siner nâchkomen vnd dez vorgenemten gotzhus schaden. Vnd ist diz alles redlich vnd reht beschehen vnd vollefu^ert mit allen den worten^a) vnd werken, so darzů gehorten vnd nôtdurftig wârent von reht vnd von gewonhait vnd als ez kraft hatt. Vnd dez alles ze ainer gantzzer vnd êwiger sicherhait so han ich der êgenemt Burkart von Ramswâg min insigel gehenkt an disen brief fúr mich vnd alle min erben. Diz beschach vnd ward dirre brief geben ze sant Gallen in dem closter an dem na^ehsten samstag vor sant Andres tag dez zwelfbotten in dem jâr, do man zalt von gottes gebúrt drúzehenhundert jâr vnd darnâch in dem ain vnd sehszigosten jâre.

Source Fulltext: Chartularium Sangallense VII, Nr. 4769, S. 572-574.