Allen dien, die disen gegenwrtigen brief iemer an gesehent alder ho^erent lesen, kunden wir von gottes genaden abt H.¹ vnd der conuent alle gemainlich des gotteshuses ze sant Gallen, das wir von dem ergernden ritter hern V^olrich von Gutingen² entlehet vnd enphangen haben vnd in vnsers gotteshuses offenbaren nuzze beka^eret funzig march Silbers Costencer gewa^eges, die wir im wider geben vnd gelten son ze den tagen, als hie nach gescriben ist, von ingentem ma^egen, der nu na^est kunftig ist, vber ain iar sehzehen march vnd von dannen vber ain iar sibenzehen march vnd von dannen vber ain iar aber sibenzehen march, vnd won er vns vnd vnserm gotteshus nuzberlich ze hilf komen ist, das haben wir an gesehen vnd erkennet, als billich ist, vnd haben im die genade geton von frigen můt vnbetwngelich vnd mit gemainem rât vnd willen vnd haben vns im gebunden allesament für vns vnd vnse^a) gotteshus vnd fur vnser nach kamen, das wir die burch vnd das burchlehen ze Hagenwille³ vnd a^ellu du pha^ender, du er von vnserm gotteshus het vnd du gescriben sint an den hantuestinan, die er dar vber het⁴, niemer gelosen noch wider gekofen son von im, die wil er lebt, wir wen och, das disu buntnust hab die kraft, als si vor ainem rihter sige gescha^ehen. Disu buntnust ist och geschehen mit allen den worten vnd werchen, du man het alder han sol von gewonhait alder von gescribem reht in solichen Sachen. Der vor genemt her V^olrich het och gelopt vnd sol och das sta^et han mit bedinge, das er voilefur vnd laiste vns vnd vnserm gotteshus a^ellu du dinge, der er vns gebunden ist ze tu^enne mit der burg ze Hagenwile vnd mit dem burchlehen der selben burch, als su gescriben sint an den briefen, die er von vnserm gotteshus het, vnd das der vor genemt her V^olrich niemer von vns ald von vnseren nach komenen an der burch vnd dem burchlehen ze Hagenwille vnd an allen dien pha^endern, du er von vnserm gotteshuse het vnd du gescriben sint an den hantuestinan, die er da vber het, becra^enchet mug werden, dar vmbe so wider sagen wir allem dem reht, so wir haben von sunder briefen alder von gescribem reht der ba^ebst ald der kaiser, da mit wir ald vnser nach komen nû ald hernach vns mo^ehtin beschirmen, da mit im sin reht becra^enket wrde. Vnd das dis war sige vnd sta^et belibe, dar vmb so geben wir dem vor genemten hern V^olrich disen brief besigelt mit vnseren insigeln ze ainem sta^eten vrchund aller der dinge, so an disem brief gescriben sint. Dirre brief wart gescriben vnd gegeben ze sant Gallen des iares, do man zalt von gottes geburt druzehenhundert vnd druzehen iar, an dem andern sunentag in dem redmanot, da ze gegen waren die erba^eren gezuge, die hie nach gescriben sint, her R. von Roschach kilchenherr ze Roschach⁵, C. von Luterberch⁶, V^olrich von Meldeg⁷, C. der Kuchimaister⁸, Johans der Fuller, Fluri der marscalch von Mainbrehzhouen⁹, C. der schench von Landeg¹⁰, Egelolf vnd Hadmar die vo^egt von Wartense¹¹, R. der Bader vnd ander biderber luten vil.

Source Fulltext: Chartularium Sangallense V, Nr. 2845, S. 234-235.