Omnibus Christi fidelibus presencium inspectoribus Hainricus dei gratia abbas totusque conventus monasterii sancti Galli ordinis sancti Benedicti Constanciensis dyocesis salutem cum || noticia subscriptorum. Rebus gestis ab oppugnacionis future cavetur materia, si sibi scripturarum amminiculum veritatis apud posteros prebeat argumentum. Noverint igitur uni||versi tam posteri quam presentes, quod veniens ad presenciam nostri dominus Waltherus felicis recordacionis dictus Lesti capellanus capelle sancti Oswaldi annexe nostro || monasterio antedicto et possessionem dictam Oglinsberch iam dicte capelle pertinentem accedente nostri omnium bona voluntate et consensu nomine ipsius capelle vendidit et recto tytulo vendicionis transtulit in discretum virum Johannem dictum Fuller civem oppidi sancti Galli pro||
decem marchis argenti ponderis Constanciensis, nichilominus nobis promittens et se ad hoc astringens, ut pro eodem argento aliam possessionem predicte capelle reconpense nomine conpararet. Nos itaque dictus abbas recepta resignacione prescripte possessionis a prefato domino Walthero ipsam faciente nomine dicte capelle ipsam dicto Johanni rite et legitime et omnibus dominis conventus nostri monasterii presentibus et ad hoc consensum expressum adhibentibus contulimus et nos sibi contulisse nomine iusti feodi presentibus profitemur, volentes, ut ipse suique heredes vel illi, in quos dicta possessio per ipsos tytulo vendicionis transferatur, ipsam possideant, habeant nomine feodi perpetuo et sine cuiuslibet obice contradictionis pacifice et quiete. Sed quia dictus dominus Waltherus viam universe carnis est ingressus, reconpensacione promissa dicte capelle per ipsum nondum facta, et cum eciam ipsum argentum, scilicet decem marche prenotate, apud predictum Johannem diu post obitum dicti domini Waltheri sine fructu et usu dicte capelle reposite permanerent, nos inito consilio et prehabita deliberacione diligenti et consensu unanimi nostri omnium accedente necnon concurrente, consensu discreti viri domini Jacobi pro tempore, quo hec facta sunt, existente capellano dicte capelle, qui hec approbavit et voluntate libera acceptavit, a predicto Johanne ipsum argentum recepimus et in usus notorios nostri nostrique monasterii convertebamus, facta tamen prius per nos predicte capelle reconpensa infra scripta, videlicet quod donavimus eidem redditus unius libre et duorum solidorum denariorum monete Constanciensisde possessione dicta Obern Jonzruti abbatie nostri monasterii specialiter pertinenti, volentes, ut prescripta omnia eam vim habeant, ac si facta fuerint in iudicio. Adhibite sunt etiam per nos in prefata infeodacione omnium verborum et gestuum sollempnitates, que de facto vel iure scripto in talibus collacionibus debent vel consweverant adhiberi. Et in horum omnium evidenciam firmiorem sepe dicto Johanni presentes dedimus nostri sigillorum karactere communitas. Ego eciam Jacobus predictus capellanus dicte capelle omnia et singula supra scripta meo consensu ratificavi, approbavi et libenti animo voluntarie acceptavi, et in huius rei evidenciam sigillum meum eciam presentibus duxeram appendendum. Acta sunt hec et facta apud sanctum Gallum, anno domini M°.CCC°. XIII°. pridie idus febr. indictione undecima.

Source Fulltext: Chartularium Sangallense V, Nr. 2848, S. 237-238.