Wir Hiltpolt von gotes genaden apt¹ des gotzhus von sant Gallen kunden vnd vergiehen allen den, die disen brief sehent lesent oder || ho^erent, das fur vns kam her V^olr. von Guthingen² ritter vnd in vnser hant vns vf gap den hof ze Ro^etziswile^a)3, den hof an der Egge⁴, || die muli ze Hagenwile^a)5, die schůpůz, da Růdolf der muller vf sitzet, vnd die rutinan, die in den Nidern Aichen⁶ ligent, vnd die || rutinan in Alt Ruti⁷, vnd bat vns, das wir ime vnd frv^o Margareten⁸ siner elichen wirten lihen gemainlich ze burglehen du vorgenemten go^eter, wan sie och recht burglehen sint vnd geho^erent ze der burg ze Hagenwile^a), du och burglehen ist von vnserm gotzhus, vnd wenne wir ald vnser nachkomen mugen ald wellen, so sulen wir wider koffen du vor geschriben go^eter, als die brief⁹ kundent vnd sagent, die dar vber von vnsers gotzhus wegen geschriben vnd geben sint. Du selben vor genemter^b) go^eter lihen wir vnd haben gelihen durch bette hern V^olr. von Guthingen ime vnd siner elichen wirten frv^o Margareten ze rechtem burglehen inen baiden gemainlich mit disem brief vnd als da vor geschriben stat. Der vor genemt her V^olrich von Guthingen gap och vf in vnser hant die zwen wingarten, die gelegen sint vnder der burg ze Grimmenstain¹⁰, die man da haisset die Geren¹¹, die von vns vnd vnserm gotzhus recht lehen sint, vnd bat vns, das wir die selben wingarten lihen ze rechtem lehen ime vnd frv^o Margareten siner elichen wirten inen baiden gemainlich, das wir och durch sine bet getan haben vnd mit disem brief lihen vnd gelihen haben ze rechten lehen die vor genemten wingarten hern V^olr. von Guthingen vnd frv^o Margareten siner elichen wirten inen baiden gemainlich. Vnd das diz war sige vnd statte belibe, dar vmbe so geben wir apt Hiltpolt da vor genemt disen brief besigelt mit vnserm insigel. Diz beschach vnd wart dirre brief geben ze sant Gallen an sant V^olr. abent, do man zalt von gotz geburte druzehen hundert iar, darnach in dem zwainzegosten vnd dritten jar.

Source Fulltext: Chartularium Sangallense V, Nr. 3188, S. 454-455.