Venerabili in Christo abbati et conventui monasterii sancti Galli Swigerus prepositus de Curwalde et V^ol. dictus de Iuualt canonicus Curiensis iudices a sede Magunt(ina) delegati salutem. Dudum inter vos ex parte una et conventum monialium de Oberriet ex altera super quibusdam possessionibus in Norsingin sitis coram domino Constantiensi episcopo loci ordinario suborta materia questionis, proposuit pars adversa, quod mulier quedam, que dictas possessiones a monasterio vestro hereditarias obtinebat et exinde vobis censum annuum persolvebat, ius suum donavit eisdem, de quibus possessionibus etiam ipse censum debitum aliquandiu reddiderunt, vobis proponentibus ex adverso, quod dicte possessiones monasterio vestro proprietatis iure pertinent, quod et pars adversa minime negat, et ideo in dampnum vestrum a quocumque in alium transferri non possunt, maxime cum consensus vester a donatore numquam requisitus fuerit vel obtentus. Quod vero de solutione census dicitur, eam vim non obtinet usquequaque, ut donationem predictam, que per se nulla est, robur habere faciat aut possessionis perpetuo retinende cuiquam ius concedat. Quibus ita propositis, quia ex confessionis^a) partium constitit evidenter, dictas possessiones monasterio vestro proprietatis nomine pertinere, memoratus dominus Constantiensis episcopus sententialiter pronuntiavit, quod nec per donationem mulieris donatorie nec per census solutionem ius possessionum perpetuo retinendarum est monasterio in Oberriet aliquatenus acquisitum, perpetuum eis inponens silentium de predictis¹. Nos igitur sententiam ipsam auctoritate iud(icum)^b) sancte Magunt(ine) sedis, qua fungimur in hac parte, per omnia confirmamus, sepedictas abbatissam et conventum de Oberriet vobis in expensis legitimis, quas fecistis a die interposite appellationis occasione huiusmodi et facturi estis, usque dum sententie pareatur, nichilominus condempnantes. Dat. in ecclesia sancti Martini Curien(si)², anno domini M°.CC°.XLIII°. mense aprili, quarta feria proxima post festum Marci ewangeliste, indictione prima. Testes horum sunt: Hainricus decanus maioris ecclesie Curiensis³, Volcmarus et Fridericus sacerdotes sancti Lucii Curien(sis)⁴, V^olricus et Ru^odolfus sacerdotes de Curwalde Curiensis diocesis, Hermannus subdiaconus sancti Lucii Curien(sis), Fridericus subdiaconus maioris ecclesie Curiensis⁵ et alii quam plures. Ego vero V^olricus dictus de Iuualt canonicus Curiensis sigillum proprium non habens sigillo decani mei usus sum ad presens.

Source Fulltext: Chartularium Sangallense III, Nr. 1320, S. 258.