Frater Hugo miseratione divina tituli sancte Sabine presbyter cardinalis apostolice sedis legatus dilecto in Christo scolastico ecclesie Argentinensis salutem in domino. Abbas et conventus monasterii sancti Galli ordinis sancti Benedicti Constantiensis diocesis ad Romanam ecclesiam specialiter et proprie pertinentis nobis humiliter supplicarunt, ut, cum venerabilis pater episcopus Constantiensis in ipsos et monasterium et terram ipsorum suspensionis et interdicti sententias non ex delegatione apostolica fulminant contra libertates et privilegia eis ab apostolica sede indulta indebite, ne dicamus temere veniendo in ipsorum non modicum preiudicium et gravamen, providere super hoc prefatis abbati et conventui curaremus. Discretioni tue qua fungimur auctoritate mandamus, quatenus vocatis, qui fuerint evocandi, et auditis hinc inde propositis, si dictas suspensionis et interdicti sententias inveneris contra eadem libertates et privilegia esse latas, illas auctoritate nostra relaxans audias, si quid fuerit questionis, et debito fine decidas, faciens quod decreveris per censuram ecclesiasticam firmiter observari, non obstante, si iamdicto episcopo a prefata sede indultum existat, quod interdici, suspendi vel excommunicari nequeat per litteras dicte sedis vel legatorum ipsius non facientes plenam et expressam de indulto huiusmodi mentionem. Dat. Treueri, non. iulii, pontificatus domini^a) pape IIII. anno undecimo.

Source Fulltext: Chartularium Sangallense III, Nr. 1492, S. 369-370.