Universis presentem paginam inspecturis B. dei gratia sancti Galli abbas¹ || rei subscripte noticiam. Supplicarunt nobis religiosi viri prepositus et || conventus de Martello² ordinis Premonstratensis Constantiensis dyocesis, ut, || cum bone memorie Conradus miles dictus de Hegingin³ et duo filii eiusdem Conradus et Ebirhardus curam animarum suarum agentes unicum mansum situm apud Rvtelingin⁴, qui vulgariter dicitur Buchilershv^obe, monasterio ipsorum prepositi et conventus contulissent ea scilicet conditione, aliter enim non poterant, si nobis, quod circa hoc fecerant, complaceret, collationi huiusmodi consensum nostrum accomodare dignaremur. Cum igitur dicti donatores et donatarii nobis et monasterio nostro ius proprietatis in predicto manso recognoscant et ipsi prepositus et conventus pro huiusmodi recognitione offerant monasterio nostro singulis annis in perpetuum in festo beati Galli unam libram cere annui census nomine persolvendam, nos eorum desideriis pio concurrentes assensu mansum predictum sub censu prescripto prefatis preposito et conventui de Martello perpetuo iure duximus concedendum, eo salvo, quod, si canon iste sive census per biennium non solvatur nusquam alibi quam in monasterio nostro exhibendus, mansus idem ad nos eo ipso vacuus libere revertatur. In quorum omnium testimonium et robur perpetuum presens scriptum sigilli nostri munimine roboramus. Actum apud sanctum Gallum, anno domini M°CC°LVI°. V. idus mar.

Source Fulltext: Chartularium Sangallense III, Nr. 1544, S. 402.