In gottes namen amen. Alle die disin brief lesent alder ho^erent lesen, die sont wizzen, dc her Rv^odolf von Rorschach¹ vnd fro^v Willibirch² sin hu||sefro^vwe vnd ir kint Rv^odolf vnd o^vch Rv^odolf ir aegennen kneht Heinrichen, der da heizzet Merboth von Lanquathvn³, vnd sinv kint dir || maesterinun vnd dim conuenth der swestervn an dem Brv^ele ze sant Gallin⁴ ze aegenne hant geben ledeklich vnd vmbetwungelich durch || got mitte allem dem rehte, so siv in vnzher hant gehan, vnd inzihint sich gegin im alles des rehtes vnd der ansprâch, so siv alder ir kint alder ir erben vmbe in ze geistlichim oder ze weltklichem gerrihte^a) mohtin han, vnd hant dc gelobet mit ir tri^vwen in aedes wîse, dc siv dien seben^b) swestervn ab nemen vmbe den selben kneht alle klage vnd alle ansprâch, die siv mohten han von^c) iro kinden, die dâ ze gegin nivt waren, vnd ist gedingot vnd o^vch gelobet von dem selben hern Rv^odolfe von Rorschach vnd von siner husefro^vwen vnd von ir kindon, die da vor genamt sint, dc siv dir maeisterinun vnd dem vor genamthen conuenthe den selben kneht Hainrichen vor aim rehten herren vnd aim aenwellingin abbet ze sant Gallin⁵ mit vf genne vnd mitte allen dien dingen virrihten, als ez o^vch gedinget wart ze tv^enne vmbe dc gv^ot ze Lanquathvn vnd vmbe Eberlin des selben Heinrichs brv^oder⁶, âne alle gevêrde. Das diz gedinge vnd diz geschefte staete vnd veste âllewegent belibe, so henket herre Rv^odolf von Rorschach sin insigil ze aim steten vrkvnde an dizin brief. Diz beschach in dem dorfe ze Rorschach vor der mêrvn kilchtur vnderm helmhuze, an dem maentage dim^d) nehstun nach des hailigen krvzes tult in dem maeien, do man von husirs^b) herrin gottes gebortlichin tage zalt tuzint zwehvndert vnd sehs vnd sibinzig iâr, da wc ze gegin her Wernher der lupriester von Golda⁷, her Rv^edeger lupriester ze Rorschach, her Heinr. vnd her Burchart von Wartinse⁸, Rv^odolf von Ramso^vwe⁹, Heinrich von Hyltinrieth¹⁰, Gotfr. hern Rv^odolfes amman von Rorschach, maeister Herman von Riedern¹¹, V^olrich von Svlnz¹², meister Cv^onr. Schili, Rv^odolf der Senne, Cv^onrad Lutman, . . der keller von Rorschach, V^olr. der Heder vnd maenge andere.

Source Fulltext: Chartularium Sangallense IV, Nr. 1969, S. 143.