+ Johannes + episcopus servus servorum dei dilectis filiis . . abbati¹ et conventui monasterii sancti II Galli ordinis sancti Benedicti Constanciensis diocesis salutem et apostolicam benedictionem. Ex parte vestra fuit propositum || coram nobis, quod nonnulli clerici et laici, asserentes se in vos aliquid questionis habere, aliquando monachos || interdum conversos et nonnulla animalia et alia bona monasterii vestri pretextu cuiusdam prave consuetudinis temeritate propria vadiare, invadere ac tandiu detinere presumunt, donec sit eis de huiusmodi questionibus iuxta ipsorum beneplacitum satisfactum, quamquam iurisdictionem, qua hoc possint in vos, non habeant ordinariam seu etiam delegatam. Cum itaque iudicialis vigor sit ideo in medio constitutus, ut nemo sibi audeat presumere ultionem et ob hoc id tanquam nullo iure subnixum non sit aliquatenus tolerandum, nos volentes quieti vestre consulere ac predictorum malitiis obviare, auctoritate presentium districtius inhibemus, ne quis predicte consuetudinis occasione vobis memoratas inferre molestias ac bona monasterii vestri absque iuris ordine occupare, vadiare seu quomodolibet detinere presumat. Nulli ergo omnino hominum liceat hanc paginam nostre inhibitionis infringere vel ei ausu temerario contraire. Siquis autem hoc attemptare presumpserit, indignationem omnipotentis dei et beatorum Petri et Pauli apostolorum eius se noverit incursurum. Dat. Viterbii², non. martii, pontificatus nostri anno primo.

Source Fulltext: Chartularium Sangallense IV, Nr. 1983, S. 154.