Nos Růmo dei gracia abbas¹ monasterii sancti Galli totusque conventus eiusdem omnibus presentem litteram inspecturis subscriptorum noticiam cum salute. Ut ea, || que zelo devocionis et pietatis intuitu fiunt racionabiliter seu aguntur, sub perpetua maneant firmitate, scripturarum debent indiciis perduci ad memoriam tam presencium || quam futurorum. Noverint igitur universi tam posteri quam presentes, quod cum Martinus miles de Randegge² curiam sitam in villa Shlattingen³, quam ibidem || quondam pater suus possidebat et tenebat et quam ipse Martinus ibidem possedit, teneret a nostro monasterio in feodum, idem zelo devocionis accensus nobis humiliter supplicavit, ut recepta resignacione curie supradicte eam in . . priorissam ac conventum et monasterium Vallis sancte Katherine⁴ prope Diezenhouen⁵ transferremus cum omnibus suis pertinenciis et iuribus ab eisdem, pro censu annuo videlicet uno fertone cere . . custodi nostri monasterii nomine et vice ipsius solvendo pro censu annuo in festo beati Martini singulis annis cum eisdem pertinenciis perpetuo quiete et pacifice possidendam. Nos itaque suis racionabilibus peticionibus inclinati, attendentes quod summa racio est, que pro religione facit, curiam supradictam cum omnibus suis pertinenciis et appendiciis, quocumque nomine censeantur, premisso et adhibito tractatu sollempni, qui circa talia adhibendus est iuxta canonicas sanctiones, in prefatam priorissam ac conventum ibidem necnon dictum monasterium Vallis sancte Katherine tenore presencium sollempniter transferimus consensu nostro unanimi accedente, ab eisdem et a dicto monasterio perpetuo quiete et pacifice cum omni utilitate sine inquietacione qualibet possidendam, adhibita in huiusmodi translacione verborum et gestuum sollempnitate debita et consueta. Debent autem nomine census curie prelibate priorissa prefati monasterii ac conventus, qui pro tempore fuerint, custodi nostri monasterii, qui pro tempore in eodem officio extiterit, singulis annis perpetuo in festo beati Martini apud sanctum Gallum unum fertonem cere exsolvere et presentare in usus altaris maioris nostri monasterii convertendum. Ut autem ea, que premissa sunt, nullo possint tempore violari, renunciamus circa ipsa pro nobis nostroque monasterio presencium per tenorem beneficio restitucionis in integrum, litteris a sede apostolica vel aliunde inpetratis aut eciam impetrandis, deffensioni seu auxilio non adhibite sollempnitatis, omni suffragio iuris canonici vel civilis et generaliter omni auxilio tam in specie quam in genere, quo mediante ea, que premissa sunt, vel ipsorum quodcumque possent quovis ingenio violari. Et in evidenciam omnium premissorum huic instrumento sigilla nostra duximus appendenda. Datum et actum apud sanctum Gallum, anno domini M°.CC°.LXX°VII°. II. idus decembris, indicione VI^a. Presentibus V^olrico cappellano rectore ecclesie in Staina⁶, magistro Johanne doctore puerorum apud sanctum Gallum⁷, Hermanno de Reine⁸, Johanne prebendario sancti Leonardi⁹ clericis, domino Bertoldo custode monasterii sancti Galli¹⁰, domino Rů. de Roschach¹¹ milite, fratre Cůnrado de Marpach¹² et aliis quampluribus fidedignis.

Source Fulltext: Chartularium Sangallense IV, Nr. 2000, S. 168.