Wilhelmus dei gratia abbas¹ sancti Galli omnibus Christi fidelibus presens scriptum intuentibus salutem cum noticia subscriptorum. Ut ea, que geruntur in tempore, oblivionis caligine vel cuiusvis doli ingenio nequeant aboleri, prodest ipsa scripturarum et testium indiciis perhennari. Ad noticiam igitur universorum ac singulorum contextu presencium cupimus devenire, quod cum vir discretus Lutoldus de Smidberg², qui nostro monasterio iure pertinet servitutis, nobis et nostro monasterio grata serviciorum genera hactenus^a) impenderit, possessiones sive curias Obrenwise³ necnon Honwart⁴ nostro monasterio pertinentes taxatas, ut annis singulis quatuor libras monete Constan(tiensis) in redditibus valere debeant, emere a nobis, ut sue eas utilitati applicaret, desideraret, nos exigencie meritorum suorum cupientes grata vicissitudine respondere receptisque nichilominus ob hoc ab eo quinquaginta libris monete Constan(tiensis), quas nobis appensas integraliter et in utilitatem nostri monasterii conversas presentibus confitemur, memoratas possessiones sive curias monasterii nostri sepefati dictas Obru^enwise et Honwart accedente voluntate et consilio et assensu tocius nostri conventus sepefato Lutoldo donamus et donavimus, tradimus et tradidimus necnon contulimus cum omnibus et singulis pertinenciis iuribus et integritate, hominibus ad curias sive possessiones easdem pertinentibus dumtaxat exceptis, quos a nostro monasterio nullatenus^a) transferimus nec alienamus, sibi suisque liberis seu heredibus iusto feodi titulo quiete et pacifice exnunc inantea possidendas. Promittimus^b) nichilominus bona fide, quod nos memoratum Lutoldum et heredes suos, quos earundem curiarum sive possessionum possessores fieri continget, circa perceptionem reddituum earundem possessionum et quietam possessionem iurium eisdem attinencium nullatenus inquietabimus nec impediemus, sed pocius contra quoslibet ipsum vel ipsos heredes volentes vexare vel gravare tutele nostro patrocinio defendimus et ad hoc idem faciendum nostros obligamus, qui pro tempore fuerint successores. In horum autem evidenciam presentes sibi contradi fecimus sigillorum nostri nostrique conventus munimine roboratas. Acta sunt hec in castro nostro Iberg⁵, anno domini MCC.LXXXV. V. idus maii, ind. XIII, presentibus viris discretis cappellano nostro de Ewil⁶, Nicol. viceplebano in Watwile⁷ etc., nobili viro Ffrider. de Toggenburg comite iuniore⁸, Johanne de Luterberg et Jacobo⁹ fratre suo etc. et aliis quampluribus fidedignis, in domino feliciter amen. Datum apud sanctum Gallum, anno et indiccione predictis, XIII. kl. iunii.

Source Fulltext: Chartularium Sangallense IV, Nr. 2140, S. 288-289.