Allen denen, die dissen brieff ansehend oder ho^erend lesen, kündt ich her Hans von Scho^ennenberg¹ ain ritter, das ich han gegeben ze koffend rechtt vnd redlichen frö Margrett von Vrichen der maistrin von Munsterlingen² vnd dem couentt demselben gotzhus ain acker vnd ain wiß zů Lu^efeln³ zu Kesswil⁴ vnd alles, das dar zů ho^ertt, mitt stock mitt zwig, als sitt vnd gewonlichen ist, das Hainrich des Rüden gůtt was, der mier das selb gůtt vffgab vnd sich daran verziech für sich vnd für all sin erben alles des rechtten, so er daran hett, vmb VII lib. dn. Costentzer müntz, vnd habend öch die dn. all von inen enpfangen, ich der vorgenantt von Scho^enenberg veriech an dissem brieff, das ich vnd min erben das vorgesprochen gůtt dem couentt vnd dem gotzhuß zů Munsterlingen verggen sondt von minem herren dem aptt zů santt Gallen, von dem das vorgenantt gůtt lehen ist, wen es der couent von Munsterlingen erwerben mag an^a) im alder ich alder min erben erwerben mugend an im on alle geva^erdt, so mier yemer schierentz mugend, die wil vnd das nitt beschehen ist, so bin ich vnd min erben gebunden dem couentt des vorgenantten gotzhus ze tu^endt vnd ze laisten weß můssend an vns, das wier mugend ze tondt mitt dem selben gůtt on vnsern schaden. Vnd das diß war sy vnd stet belib von mier vnd von allen minen erben, da von so batt ich der von Scho^ennenberg minen herren bischoff Růdolffen von gottes gnäden bischoff ze Costentz⁵, der gab sin insigel an dissen brieff ze ainem wären vrkuntt, vnd ich her Hans von Scho^ennenberg gib och min insigel an dissen brieff ze ainem steten vrkundt vnd ze ainer wärhaitt, so an dissen brieff geschriben statt. Wier bischoff Růdolff von gottes gnäden bischoff ze Costentz gebend vnser insigel an dissen brieff ze ainem steten vrkundt. Der brieff wardt gegeben ze Costantz ze santt Andras dultt des iaurs, do man von gottes geburtt zaltt MCCLXXXVI jaur. Des ist gezüg, die es sächendt vnd horttend, her Conratt von Haidelberg⁶, her Burckartt von O^etlihusen⁷ ritter, V^olrich von Kesswil, der Keller, der Aher, Hainrich der Rüde vnd ander biderber lütt genůg.

Source Fulltext: Chartularium Sangallense IV, Nr. 2169, S. 308-309.