In gottes namen amen. Wir herre Rv^odolf von Gvtting(en)¹ ain lant rihter in Rintal an kvnc Rv^odolf von den || gnaden gottes ain voct ze Rome an des stat tv^ogent chvnt an disem brief allen den, die in lesent alde || horent lesen, daz Waltehr der anman von sant Gallen² an der bvrger stat vnd^a) an alles des landez stat claget || hin zen bvrgern von Rinegge³, daz si naemen vershaz, der dem lande niht gewonliche waere noch reht, vnd claget mit nam(en) hin ze den Helden, Rv^od. vnd H. vnd Eber. vnd ze Bvrcart von Rin an dem lantage ze Visherhvsen⁴. Do wart dem vor genanten Walt.^b) ir tailet, wan solt ez ziehen in die chvntshaft vmbe ain warhait zer varenne vnd an fvinf man gesezet, daz was herre C. der alte von Grimenstain⁵, herre H. vnd herre Bur. die vocte von Wartense⁶ vnd Iohannes der anman von Rinegge vnd V^ol. von Hosten⁷. Vnd ir fvrent sich dez vnd saiton daz vf ir ait, sit der Rin waer des riches rehtv frigv stra^vse, daz da vf nieman vershaz gen solti von allem lande, wan swaz v^ober die berge dar chaeme alt da hin solti, drvchens gvtes alde gebvndes, ie von dem so^vme ainen phenninc, swaz den Rin vf alde nyder vert. Disv vrtail geviel ze Visherhvsen an den^c) naehsten dvnrstage vor sant Margaretvn tac an den^c) lantage. Daz dis waer si, so gebent herre Rv^od. von Gvtting(en) lant rihter in Rintal vnsern brief vnd insigel ze ainer rehter waerhait vnd ze ainer vestenvnge ze behabenne. Acta sunt anno domini M° CC° LXXXX°I°.

Source Fulltext: Chartularium Sangallense IV, Nr. 2277, S. 385.