In gottis namen amen. Ich Heinrich der Blarrer ratgebe des spitâlis ze sante Gallen¹ kivnde allen den, die disen^a) briefh lesint alt ho^erint le||sin, dc Johans der Tiv^esche ko^vfman den hove ze Livchingin², den er ko^vfte vmbe Cv^onraden den Litscher von Werdinberc³ vnd^b) vmbe V^olrichin sin svn, || het gegebin livterlich dvre got dem spitâle ze sante Gallen mit siner wirtinne willen vron Jvdinthvn Hainrichs saeligin tohter dz Vedirers von Alt||stetin⁴. Den enpfienc ich an des spitâlis stat, also dc ich den selbin hof sol tragen deme spitâle vnd Johanse dem Tivschim ko^vfman vnd siner wirtinne, vnd ist gedingit, dc er vnd sin wirtinne vnd alle ir lîb êrbin des selbin hovis nvzze son niessin vnd erbin mit allim rehte, vnz dc siv lebint, vnd sol Johans vnd sin wirtinne, die wîle siv lebint, gebin dem spitâle ze cinse an sant Gallen tage ain pfvnt wahsis, vnd swedirs dc ander vber lebit, dc sol danne, vnz es lebit, deme spitâle gebin fivnf Schillinge ze dem jârgezite. O^vch ist gedingit, dc alle ir lîb êrbin, die siv samint gewinnent, den vorgenanten hof son enpfahen von deme spitâle nah ir vatter vnd ir mv^oter tode iegelich kint mit sehse pfenningin, vnd sol der spitâl dc selbe gv^ot danne inen lihen vnd allen iro lîb erbin ane alle wider rede, vnd son die selbin lîbe erbin nah ir vatter vnd ire mv^oter tode dem spitâle gebin jârlich ze den jârgezîten zehen Schillinge. Vnd swenne der spitâl vberlebit die lîb êrbin alle, so ist der vorgenande hof ledig dem spitâle. Geschith o^vch dc, dc Johans vnd sîn wirtmne sterbint âne lîb êrbin, so ist aber der vorgeshriben hof deme spitâle gar vnd ganzzelich ledig. Gewinnet o^vch diwedirs nah des andern tôde andirv kint, dv son dz selbin gv^otis nith êrbin, vnd swenne siv beidv sterbint, so ist^c) aber der vorgenande hof dem spitâle ledig. Vbir dc ist o^vch gedingit, wil Johans alt sin wirtinne vro Jvdinthe dz Vedirers sa^eligin tohter alt iro lîb êrbin den selbin hof vmbe dikain iro nôt verko^vfen, dc son siv tv^on in dem rehte, alse siv in niessint. Vnd dc dis allis, dc hie vor geshribin stât, gânz vnd staete belîbe, so henke ich Hainrich der Blârrer min ingesigile vnd der spitâl sîn ingesigile an disen geginwrtigin briefh ze ainem sta^etin vrkivnde. Dis geschach, do man zalte von vnsirs herrin gebvrtlichin tag tvsint jâr, zwai hvndirt jâr vnd nivnzic vnd zwai jâr. Da zegegine was brv^odir Rv^odolfh dz spitalis pfleger, Heinrich der Smît, Hainrich der Ko^vfman, Wêrnhêr der Hvnt vnd ander êrbêr livthe gnv^oge.

Source Fulltext: Chartularium Sangallense IV, Nr. 2302, S. 401-402.