Allen, die disen brief sehent alde ho^erent lesen, chvnden wir Elisabeth grevin von Homberg vnd^a) frowe ze Rapreswile¹, gra||ve Herman von Homberg vnd Ita sin swester grevin von Homberg², das wir vnser eigen, swas wir hatten ze Meriswandon³ lvte vnd gůt vnd || den hof, da der chilchen saz in ho^eret, mit alr ehafti, mit wisen, mit aker^b), mit holze, mit velde, mit wunne, mit weide, mit wasser rvnse vnd mit || allem dem rechte, als wirs dar hatten bracht, vercho^vft vnd geben hein hern Go^etfrid von Hvnoberg⁴ zeigne vmb zwenzig vnd dru hvndert march lo^etigs silbers vnd sin o^vch der gwert alleklichen, vnd ist dis beschehen mit mis vogtes hant hern Rv^odolfs von Wediswile⁵ des frijn, den ich vber die sache nam. Vnd ich Ita von Homberg dv grevin han es o^vch getan mit mis vogtes hant grauen Hermans von Homberg mis brůder, vnd sol ich dv vorgnande grevin Elisabet wer sin der vorgnanden lvte vnd gu^eter an geislichem vnd an weltlichem gerichte vnd an allen den stetten, da sin her Go^etfrit von Hvnoberg bedarf gegen rechte, ald sin erben, ob er enwere. Vnd han o^vch gesworn zen heiligon offenlichen, das ich die vorgnanden lvte noch gůt niemer gevordron sol an geislichem noch an weltlichem gerichte noch an keinr stat, da es hern Go^etfride von Hvnoberg ze schaden kome ald sinen erbon. O^vch han ich bvrgen geben fur minv chint Wernhern, Rv^odolfen, Lvdwigen, Zilien vnd Clarvn⁶, swenne sie zir tagen komen, das sie die vorgnanden lvte vnd gůt vfgeben svn vnd vertgon hern Go^etfride von Hvnoberg ald sinen erbon mit allem dem rechte vnd der gwarsami, als er sin bedarf ald sin erben. Vnd sint dis die bvrgen graue Herman von Homberg, her Rv^odolf von Wediswile, her Rv^edge von Werdegge⁷, her Peter von Ebtingen⁸, Jacob der schulthezze von Rapreswile⁹, Heinrich von Ebno^ede¹⁰ der amman, Albrecht von Rvti¹¹, Walther Glarner, Johans Gamlvnstein, Heinrich der Amman von Rapreswile, V^olrich von Chaltbrvnnon¹², Kraft von Ebno^ede¹³, Chv^onrat der Truchsezze¹⁴, Heinrich der Marschalch¹⁵, Rv^odolf von Wagen¹⁶, Wernher von Rambach, Arnolt Lo^eidgast, Heinrich Ekol, Chv^onrat der Banwart vnd Dietrich Heginli, vnd hant die selben burgen globt bi ir truwe an eis eides stat, sich Zvrich¹⁷ ze entwurtenne in recht giselschaft ane alle geverde nach der stat gwonheit ald ieliehe ein ersamen man ze leginne an sin stat, ob er wil, mit hern Go^etfrits wissinde von Hvnoberg ald sinr erbon, ob er enwere, swenne sie gemant werdent von in ald von ir gwissen botton, dar nach inrunt acht tagen, vnz in volfv^ort werde ganzlichen alles, das da vor geschriben stat. Vnd were, das dirre burgon deheine vssrunt landes were ald in einr ander gisilschaft lege ald swelen weg er vnnuzze were, so sol ich ein andern legen an des stat mit hern Go^etfrids wissinde ald sinr erbon. Were aber, da vor got si^c), das ir keine verdurbe^d), so sol ich ein andern geben an des stat inrunt eim manode, so ichs ermant wirde, ald die andern burgen sun gisil ligen, vnz das beschicht. Vnd swenne die burgen gemant^e) werdent, so svn sie sich entwurten inrunt acht tagen in die gisilschaft, als da vor geschriben stat. Vnd das dis stete vnd veste si vnd volfu^ert werde, so geben wir Elisabet grevin vnd graue Herman von Homberg hern Go^etfride von Hvnoberg disen brief vnd sinen erbon besigilten mit vnsren ingesigiln vnd mit der burger von Rapreswile gemeinem ingesigile zeim rechten vrchvnde offenlichen. Dis geschach, do von gottes geburt waren zwelfhundert vnd nvnzig jar vnd dar nach in dem dritten jare, drier tage vor sant Paulus bichêrde, Zvrich vssrunt des graben an dem rossemargte, da ze gegni waren gezvge her Rv^odolf der Mvlner, her Rv^edge Manesse des^f) elter vnd her Rv^ed. sin svn, her Rv^odolf der lvprester von Barra¹⁸, Rv^od. der Biber, her Wernher Bibirli, Johs. Wolfleibscho, Rv^od. vnd Hartman von Chlotun¹⁹ vnd ander ersam lute gnůge.

Source Fulltext: Chartularium Sangallense IV, Nr. 2306, S. 403-405.