Allen den, die disen brief an sehent oder ho^erent lesen, kunden wir Elsebete greuin von Raprechswile¹, || das der herbestrat von Zurich von der burger wegen von Zurich vns dur vnser bette vnd dur vn||sers nutzes willen vnd dur gro^ezern schaden ze versehenne vf vnsern schaden vs nam vunf vnd zwen||zig march silbers, damitte wir Heinriche Manessen im Harde² gulten, an disem selben gůte wurden siben march verlorn. Dise zwo vnd drizig march han wir in gelobet ze geltenne ze dem nehsten sant Martis tult, das nu kumet, vnd haben darumbe ze burgen vnd ze giseln gegeben hern Ru^edegern von Werdegge³, Heinrichen von Grinowe⁴ vnsern amman, Růdolfen den Mulner den voget von Zurich⁵, hern Chůnraten den Krieg, Otten von Mulimatten vnd Bilgrinen des alten Bilgrins sun burger ze Zurich. Vnd swie dis selbe gůt ze dem vorgenanden zil nit vergolten ist, so hat her Ru^edeger von Werdegge vnd Heinr. vnser amman ze den heilgen gesworn vnd die andern burgen einer slehten gelubede gelobet, gisel ze ligenne ze Zurich in eins offennen wirtes huse nach der stat gewonheit ane alle geuerde, swenne si gemant werdent, vntz das das selbe gůt elleklich vergolten werde. Vnd swele der burgen in anderre giselschaft lege ald deheinewis gisel ze ligenne vnnutze were, so han wir in gelobet mit vnserre truwe an eins eides stat, einen wirt ze Zurich ze gewinnenne, das si einen andem an des stat legen, ob aber der burgen deheine verdurbe, so^a) svlen wir bi der selben gelubede inrunt XIIII tagen einen alse gůten geben an des stat in dem selben rechte, als der erre was, ald di andern burgen sulen gisel ligen, vntz das das beschehe. Darzů sol der rat, ob er wil, das selbe gůt an iuden oder an caurschin oder an koufen vs nemen, so si iemer vnschedelichest mugen âne geuerde, vnd binden vns vnd alles vnserre herschefte gůt mit disem brieue, swas schaden daruf gat, das wir in den abe tůn sulen ellekliche. Vnd hieruber, das dis war si vnd stete belibe, so geben wir dem vorgenanden rate an der burger stat disen brief besigelt mit vnserm ingesigele zeinem offennen vrkunde. Dis beschach vnd dirre brief wart gegeben ze Zurich, do von gottes geburt waren zwelfhundert vnd nunzig jar vnd dar nach in dem dritten jare ze sant Andreses tult.

Source Fulltext: Chartularium Sangallense IV, Nr. 2322, S. 419.