In gottis namin amen. Swer disin brief sihit ald horit lesin, der sol daz wissin, daz ein lieblich schidung || gischehin ist inszwschen abt Bertdold von sant Johans in Tûrtal¹ vnd^a) sinim conuent vnd Bertold dem || Kurzin vnd sinir wirtin Adilheit vnd alr sinir kinde vnd alr sinr erbon vmb die manslat, so er tet an sinim || aeigin herrin, dar umb im unsir geistlichir vattir der babst vnd sinir wirtirn^b) vnd sinen kindin allen vnd allen sinin erbon het widir teilt akkir vnd wisan, hûs vnd hof, aeigin vnd lehin von dem selbin gotzhûs. Vnd disu schidung ist^c) also gischehin, daz der vorginant Bertold der Kurz vnd sin wirtin Adilheit vnd sinu kint vnd alle sin erbin hein ûf gigebin hûs vnd hof, akkir vnd wisan vnd allis, daz siu von dem selbin gotzhûs hetton, vnd allie die ansprach, die siu gen dem selbin gotzhus hetton, so tûr, so einin^e) phenning virwegin mag. Vnd dar umb so git im vnd sinen erbon der vorginant abt vnd sin conuent zwelf phunt phenning Kostinzer muns. Vnd wirt du schidung iemir gibrochin^f) von dem selbin⁸ Bertold dem Kurzin ald von keinim sinim erbin, so sun siu sin in dem banne unsir geislichin vattirs des babst vnd in allen schuldin als des tagis, do er^h) sinin aeigin herrin schlv^ogⁱ⁾. Vnd dar zv^o so^k) her graue Hûg von Werdinberg², der bedunthalb vogt vnd herre ist, gilobt zi schirmin mit libe vnd mit gv^ot daz selbe gotzhus, ub diu schidung gibrochin wirt. Vnd daz dis^l) stete bilibe, so enkint^b) der selbe vogt graue Hûg vnd der abt mit dem conuent von sant Johanne iru gewerin insigil an disin geginwurtigin brief zi einim gewerin urkunde, als an disim brief gischribin stat. Dis gischach zi Werdinberg³ in V^olrichs hûs des Litscher, da zigegin warint, di hie nach geschribin stant, die o^vch dir selbe schidung gezûge sint: graue Hug von Werdinberg, her Herman von Sulzberg⁴, her Wilhelm von Richinstein⁵, her Wernher Gotschalch, Henr. der amman von Grabz⁶, V^olrich vnd Arnold der Koch vnd Wilhelm von sant Johanne⁷ vnd andir bidirbir liute^m) genv^oge, in dem jare, do man zalte von gettis^b) giburte zwelf hundirt vnd vier und nunz^b) jâr.

Source Fulltext: Chartularium Sangallense IV, Nr. 2365, S. 450.