Ich Jacob der schvlthetze^a) von Raprechtswile¹ kvnde allen dien, die disen brief sehent olde || horent lesen, das^b) die vogetege, die ich ze len han von sant Gallen, in dem hofe ze Vnder||bach² mit allem dem rechte, so sv mich an chomen ist, minem herren dem abte vnd^c) || sinem conuent ze Rvti³ verko^vfet han vmbe drie march silbers vnd ein phvnt Zvricher, der sv mich gewert hant, alse ich an disem brief vergihe. Vnd han die selbvn vogeteie ze rehtem lene verlvwen^d) ir gotshvs lvten vnd binde mich vnd alle min nahchomen, das wir die selbvn vogeteie alwege lien svn, vbe es ze schvlden kome, ane widerrede vnd ane allen schaden ir lvten oder sweme sv si lien heisent. Vnd sol dis iemer stete belibe vnsert halp, es si denne, das min herren der abt vnd der conuent von Rvti erwerben mvgen ze sant Gallen, das man das lên inen lihe, so sol ich vnd min erben das selbe lên vf geben ane ir koste, vnd svn sv es enphahen vnd dannan hin han von sant Gallen. Dis geschach in dem dorfe ze Oberndvnrethon⁴, do nah gotes gebvrte waren zvwelfhvndert iar, vi^ere vnd nvntzig iar, do geschah es, da ze gegen waren her V^olrich der kilicherre von Walde⁵, her Dietheln von Windegga⁶, Wernher von Rambach, Rv^odolf von Hasle⁷, Dîetrich Hegenli bvrgerre von Raprechtswile, Heinr. Sto^vri, Rv^odolf der aman von Grvninge⁸ vnd ander erber lvte. Ind(i)c(ti)o(n)e VII^a.

Source Fulltext: Chartularium Sangallense IV, Nr. 2357, S. 443-444.