Allen, die disen brief sehent ald ho^erent lesen, kvnden wir vro Elizabeth greuenne von Raprechtswile gra||ven Lodewiges seligen von Honberch vrowe¹, dc wir mit rechter vrteilt vmb dis nachgeschriben || sache graven Friderich von Toggenburch den eltern² ze voget namen vnd dc wir enteil vnser || nôth, die wir han von gvlte, vberwinden mo^echten, so han wir mit siner hant, gvnst vnd willen vercho^vfet den hof ze Volkiswile³, die schv^opossen ze Volkiswile vnd die schv^opossen ze Ciminchon⁴, die da geltent sechs vnd zwenzeg stvke, die vns eigenlich an horten, vron Katherinen hern Hermans des jungern von Landenberch⁵ ritters vrowe vmb fvnf vnd vierzeg march silbers Zurich gewicht vnd sin o^vch des gewert alleklich vnd hein wir vnd vnser kint⁶ dv vorgenanden^a) gůter vf gegeben mit allem dem rechte vnd mit aller der ehafti, als wirs hatten^b), an vron Katherinen hant der vorgenanden mit vnsers vogetes hant, vnd enziehen wir vnd vnser kint vns aller der ansprach, so wir iemer gehan mo^echten an dv vorgenanden gu^eter, vnd loben vnd binden vns vnd vnser nachomen, dc wir vron Katherinen der vorgenanden vnd ir erben vnd ir nachomen wer sien der gu^eter fvr lidig eigen an allen gerichten geistlichen vnd weltlichen, swa ald swenne si es bedurfen. Vnd ze einem offennem vrkvnt alles, so da vorgeschriben stat, geben wir vron Katherinen vnd ir erben disen brief besigelt mit vnserem vnd graven Friderichs ingesigeln offenlich. Dir brief wart gegeben Zurich, an sant Agnesen tag, do von gottes geburt waren zwelfhundert jar in dem vierden vnd nvnzegostem jare. ||
Wir grave Friderich von Toggenburch der vorgenande ze einem offennem vrkvnt alles, so da vorgeschriben stat, henken vnser ingesigel an disen brief offenliche.

Source Fulltext: Chartularium Sangallense IV, Nr. 2329, S. 426.