Allen den, die disen brief sehent older horent lesen, kvnden wir Elizabeth graven Ludewiges seligen wirti von Homberg || vnd vrowe ze Raprehtzwile¹, das wir hern Chvnrate dem Wizsen kor herren ze Zvrich^a)2 Wizzen sines brv^oder seligen svne || verko^vfet han vnd verko^vfen mit disem brîefe fur reht lidig eigen ane zwei fvnzig stucke gulte an mvlchen vnd an korne || in dem banne vnd der barrochie ze Vfnowe³ vnd zwei stucke in der barrochie ze Rihteliswile⁴, vnd sint das dv gu^eter, dv hie nah geschriben stant: Rapliswende⁵ das gůt fur einlvf stucke gulte, an dem Stricke⁶ das gůt fur sehzen stucke gulte vnd an Bleichen⁷ zwei stucke gulte, vnd buwet disv gu^eter Walther der Wizze, an Garten bu^ele⁸ einlvf stucke, das der Gepler hat, ze Hargarten⁸ aht stucke, da der Rube vf sitzet, in der barrochie ze Rihteliswile zewei stucke, da der Schurman vf sitzet vnd hat, vnd hein ime vnd sines brv^oder svne disv vorgenanten gu^eter gegeben vor rehtem gerihte mit vnsers vogtes hant graven Huges von Werdenberg vnsers brv^oder⁹, den wir vor gerihte ze rehtem vogte genomen haben, vnd mit vnser kinde hant Wernhers, Rudolf, Ludwiges, Cylivn vnd Clarvn¹⁰ vmb ahzig march lotiges silbers der gewiht von Zvrich, vnd veriehen, das wir das silber von ime enphangen han vnd vns mit von Juden vnd von giseln erlost han, da wir schedelich stv^onden, vnd hein ime disv vorgenanten gu^eter gegeben mit wnne, mit weide, mit holze, mit velde, mit vsgelende gebuwen vnd vngebuwen, mit wazzer vnd mit wazzer wegen vnd mit aller ehafti vnd mit allem dem rehte, so ze den vorgenanten gu^etern von alter har ie gehorte. Ouch han wir inen gegeben vnd geben mit disem briefe ze varnde vnd ze nîessende den luten, die das gut buwent, gemeinsami holz, velt, wnne vnd weide vf vnser vogteje, swa dv da lit, vnd mit namen in dem hof ze Wolrowe¹¹, vnd han vns der selben gu^eter enzigen vnd vf gegeben in sin hant vnd sines brv^oder svns ze nîessende vnd ze hande in allem dem rehte, als da vorgeschriben stat, vnd setzen si in gewalt vnd in gewer der vorgeschribenen gutern. Dar zv^o han wir inen vnd^b) dem von Werdegge¹² vnd dem von Bechenhoven¹³ mit vnsers vorgenanten vogtes hant graven Huges vnd mit vnser vorgeschribenen kinde hende gelihen die vogteie vber dv vorgenanten guter vnd vber die lute wib vnd kint, die da vffe sitzent, ze rehtem lene, also das wir die selben lute vf dem gu^ete niemer besweren sullen mit dekeiner slahte dinge, es were danne so vil, swa si ander gůt hant ane disv gu^eter vnder vnser vogteie, dv gu^eter sullen^c) wir sturen, als wir wenen reht tv^on, ir lib vnd ir varndes gůt sol lidig vnd vrî sin, wer aber, das die lute, die nv vf den gu^etern sittzent, sturben older verdurben, swen si danne vf das gůt setzent vnser luten mit vnserm willen, die lazsen wir inen in dem selben rehte vnd in der vriheit, als die ê drvffe sazsen, ze rehtem lênê vnd loben inen vnd ir erben dem von Werdegge vnd dem von Bechenhoven fur vns vnd fur vnser erben disen ko^vf stete ze hande mit gůten trvwen ane geverde, das eigen fur reht eigen, die vogteie ze rehtem lene ze niessende vnd ze hande mit twinge vnd mit banne, vnd binde darzv^o vns vnd vnser erben, disen ko^vf vnd alles, das da vorgeschriben stat, stete ze hande vnd niemer da wider ze tv^ende mit worten noch mit werchen mit vns noch mit niemanne anderer, vnd geloben fur vns vnd fur vnser erben, dis gutes reht wer ze sinde an geislichem vnd an weltlichem gerihte, swa er older sin erben sin bedurfen, des eigens fur eigen, der vogteie fur lên, vnd verzihen wir vns alles des rehtes, so wir older vnser erben an das gůt hatton, vnd aller der rehtvnge der keiser older der bebeste, dv geschriben sint older noch geschriben werdent, da mit wir disv gv^oter mohten wider gevordern^d) older disen ko^vf en dekeinen weg geirren. Vnd zeinem steten vnd ewigen vrkvnde aller der dinge, so da vorgeschoben stant, so geben wir inen disen brief mit vnserm vnd vnsers vogtes graven Huges von Werdenberg ingesigeln besigelt offenliche. Wir grave Hug von Werdenberg, wand wir sagen, das dirre ko^vf vnser swester vnd ir kinden besser was getan danne vermitten vnd ir vnd ir kinden nvtze vnd gůt was, so gehillen^e) wir des ko^vfen vnd bestetgoten mit^f) vnser hant, vnd zeinem vrkvnde aller der vorgenanten dingen so henchen wir vnser ingesigel an disen brief. Dis geschach zer Nvwen Raprehtzwile¹⁴ in dem jare, do von gotz geburt waren zwelfhvndert in dem fuf vnd nvnzigostem jare, an dem vritage nah sant Scolastigen tage, da zegegin was her Herman vnd her Hûg von Landenberg¹⁵, her Rudeger von Werdeg¹² vnd her Johans von Esche¹⁶, D. der meier von Windegge¹⁷, her Cůnrat von Slatte¹⁸, her Burchart vnd her Heinrich in dem^g) Tvrne¹⁹ ritter, Johans^d) vnser schriber, Bartholomeus von Jône²⁰, Albreht von Ruti²¹ vnd Cvnrat von Vrinkon²² vnd ander erber lute gnv^ege.

Source Fulltext: Chartularium Sangallense IV, Nr. 2369, S. 451-453.