Ich Elisabet dv grevin von Honberg vnd^a) vro^vwe von Raprechswile¹ kvnde allen, die || disen brief sehent alder horent lesen, daz ich dien ewirdigen^b) herren dem abte vnd dem || convent von Wetchingen² schvldig was XXX march silbirs, vnd wand ich bars silbirs || nich inhatte, da mit ich in virgulte, do saste ich in mit mines vogtis hant hern Hermans von Boinstetten des eltirn³, der mir mit vrteilde vber dise sahke wart zi vogte gigeben, vnd mit Wernhers mines svns⁴ hant dien vorgenanden herren von Wetchingen zi phande minen hof zi Wangen⁵ vnd mine swege zi Wege⁶, dc si von dien beiden gvten an korne vnd an mvlken ierlich nemen fvnf march wert, vnz si ir silbirs gar vnd vollekliche giwert werden. Den ersten cinz, den die vorgescriben herren von Wetchingen svllint nemin, den svn si nemin von sante Martines mes, dc nv kvmet vber ein jar. Das aber dis stete bilibe, dar vmbe han ich disen brief bisigilt mit minen ingesigele vnd mit Hermans von Boinstetten, den ich vber dise sazzvnge hatte zi vogte ginomin. Dis gischah zi Otinbach⁷ an sante Marien Magdale nvn abinde, do von gottes gibvrt warin zwelf hvndirt iar vnd fvnf vnd nvnzig jar. Die gizvge, die dis sahen vnd hôrten, dc sint der abt von Wetcingen⁸ vnd brv^oder Heinrich von Rordorf⁹ vnd brv^oder Berchtol von Schafhvsen¹⁰ vnd her Rv^odiger von Werdegge¹¹, her Jacob der schvltheise¹² vnd her Rv^o. von Bechinhoven¹³ ritere, Jo. Wolfleibhz, Herman hern Vrideboldes svn von Schafhvsen, Arndt des svn ab dem Tvrne, Vischeli.

Source Fulltext: Chartularium Sangallense IV, Nr. 2380, S. 459-460.