Wir Albrecht von gotz gnaden hertzog ze O^esterrich ze Styr vnd ze Kernden¹ tůnd kunt, das wir durch bessrung vnd widerbringung willen v´nser statt ze Rappreschwil² vnd ouch durch v´nser burger daselbs flissiger bett willen den selben v´nsern burgern die fryheyt vnd die recht gesatzt geben vnd besta^et haben vnd setzen geben vnd besta^eten inen ouch, die mit disem brieff ze behalten vnd ewenklich da by ze beliben, als von wort ze wort hernach geschriben stat. Des ersten das niemant v´nser burger von Rappreschwil vff keinen landtag laden noch von keinem landgericht vf triben, wenn das man von inen recht neme vnd si ouch recht tůn in der statt ze Rappreschwil, vmb welher ley sachen man ze inen ze sprechen hat. Wenn ouch der burger einer hinder v´ns nicht beliben wil, so mag er von v´ns faren, wenn es im fůglich ist, war er wil, a^vn alle irrung. Ist ouch, das ein burger den andren ze tod erschlecht, der ist der statt verfallen zechen pfund pfenning vnd sines libes vnd sines gůtes ist er v´ns verfallen vff v´nser gnad. Wir setzen ouch, das ein vatter sin kind erben sol vnd mag, ob das kind a^vne lib erben ab ga^vt. Ouch so^ellen si beliben by irem spital vnd by dem hus da by mit besetzen vnd entsetzen in der wise, als sy von alter her komen sind. Es súllen ouch die hoffstett ze Rappreschwil, die v´nser vyent von Zúrich sind vnd die wir von v´ns geben haben, fúrbas stúren vnd dienen als ander v´nser burger. Wir setzen ouch, das dehein fro^emder sutor deheinen schůch verkouffen sol won by dem totzen, vnd dehein vel noch dehein verschnitten leder sol er ouch nit verkouffen wenn by dem totzen. Es sol ouch deheiner by dem pfenningwert verkouffen, der nit ingesessner burger ist, won by dem viertel, es sig mel hirs bonen erwsen saltz linsi alle smalsat vnd korn. Darzů tůn wir in ouch die gnad, das sy súllen beliben by den rechten fryheyten vnd gůten gewonheyten, die ander v´nser stett haben hie oben in v´nsern landen. Des geben wir inen ze vrkúnd disen brieff besigelten mit v´nserm insigel. Der geben ist ze Baden in Ergow³ nach Crists gebúrt dryzehundert jar, darnach in dem vier vnd fúnfzigosten jare, an mittwoch vor sant Matheus tag des zwelffbotten.

Source Fulltext: Chartularium Sangallense VII, Nr. 4374a, S. 554-555.