Wir Geori von gottes gnâden abt des gotzhus ze sant Gallen¹, das ân alles mittel dem stůl || ze Ro^vm zů geho^ert, veriehen vnd tůn kund mit disem brief allen, die in ansehent lesent oder || ho^erent lesen, dz fúr v´ns kam der from Johans von Annwille² genant Tuschgi mit dem || erbern Eberhart^a) Ko^vffman burger ze Wil³, Elisabethen, Vrsulen vnd Annen sinen êlichen tohtran, vnd fůgt vnd machet do ze stett der selb Johans von Annwille mit gůter vorbetrahtung vnd beschaidenhait mit v´nser hand getat gůten willen gunst vnd verhengd mit allen den worten werken vnd geta^eten, so nach gewonhait vnd nach reht darzů gehorten vnd notdurftig warent vnd als reht sitte vnd gewonlich was, vnd fu^eget vnd machet redlich vnd reht mit disem brief dem selben Eberhart Ko^vffman, Elisabethen^b), Vrsulen vnd Annen sinen tohtren das gůt, das man nemmet Sorrendal⁴, die múli, die darzů geho^eret, mit allen rehten nútzen vnd gewonhaiten vnd mit aller zů geho^erd, das von v´ns vnd v´nserm gotzhus sin lehen ist, ze ainem rehten gema^echt vnd in rehtes gema^echtes wis, also mit der beschaidenhait, bescha^eh dz das vorgeschriben gůt von dis gema^echtes wegen an den vorgenemten Eberhart Ko^vffman, Elisabethen, Vrsulen vnd Annen sin tohtran oder an dehaines vnder inn fieli vnd ka^em, dz sú dann a^ellú oder welhes vnder inn lebet alle die nútz halb an korn an pfenningen an hu^enr vnd an aygern, so von dem vorgeschriben gůt koment vnd vallent, swo^ester Clementen von Annwille closterfrowen des conuents ze Ta^ennikon⁵ ia^erlich geben vnd rihten sont, alle die wil si lebet, vnd wenn si enist von todes wegen, so sol dann das vorgeschriben gůt mit allen rehten gantzlich an den vorgenemten Eberhart Ko^vffman, Elisabethen, Vrsulen vnd Annen sin tohtren vallen. Vnd des ze ainer warhait haben wir abt Geori dauorgenemt v´nser insigel gehenket an disen brief. Darnach vergih ich Johans von Annwille ain gantz warhait aller diser vorgeschriben ding vnd daz alles das war ist, das der erwirdig min gna^ediger herr abt Geori dauorgenemt von mir veriehen hat an disem brief, vnd ze merer sicherhait der selben ding henk ich o^vch min insigel an disen brief. Der geben ist ze Wil in der stat an dem na^ehsten zinstag vor sant Gregorien tag in dem jar, do man zalt von gottes gebúrt drúzehenhundert jar vnd darnach in dem drú vnd sibentzigosten jar.

Source Fulltext: Chartularium Sangallense IX, Nr. 5343, S. 10-11.