Allen den, die disen brief ansehent lesent oder ho^erent lesen, tu^en wir die nachgenemten Diettegan, V^olrich vnd Růdolf die Mayger von Altstetten gebrůder || wilent Diettrichs sa^eligen des Maygers von Altstetten¹ êlichen sún kund vnd veriehen offenlich mit disem brief fúr v´ns fúr a^elli v´nsri ge||swústergit fúr alle v´nser erben vnd na^echkomen, daz wir mit gůter vorbetrahtung vnd beschaidenhait nach wiser lút vnd ander v´nser || frúnd rat vnd haissen mit dem erwirdigen v´nserm gna^edigen herren abt Georien von gottes gnâden abt des gotzhus ze sant Gallen² vnd mit dem selben gotzhus lieplich vnd gu^etlich gar vnd gantzlich verrihtet sient vmb alle die sto^ess vnd missehellung vordrung vnd ansprachen, so wir von v´nser selbs oder^a) von vnsers vorgenemten vatters wegen zů im vnd zů dem selben gotzhus gehept haben von diser nachgeschriben gu^eter wegen, die v´nsers vorgenemten vatters sa^eligen gewert pfand gewesen sint von dem gotzhus ze sant Gallen, vnd o^vch von des valles wegen, so er v´ns in genomen hatt von dem armen kneht, den man nemmet der Humbel, der von aigenschaft sines libes v´ns zugeho^ert. Vnd sint dis dú gu^eter, die nider burg ze Altstetten³, die múli ze Altstetten, die mittel múli, vier pfund stúrpfenning von den sunderlúten, die da geho^erent zů der nidern burg ze Altstetten, ain pfund pfenning geltes von ainem wingarten ze Bernang⁴, ain pfund pfenning von den hofstatpfenningen ze Altstetten, zehen schilling pfenning von Gamôr⁵, ain pfund pfenning von den schafpfenning ze Altstetten, sibendhalb pfund pfenning geltes von va^ellen vnd an gela^esten von den lúten, die da geho^erent in den hof ze Altstetten, vnd der hof ze Matzingen⁶, den man nemmet des Haidens hof, also dz v´nser vorgenemter herre abt Geori die selben nidern burg gu^eter vnd pfandschatz mit allen rehten mit v´nserm gůten willen vnd gunst von v´ns gantzlich vnd gar erlo^eset vnd erledgot hat mit barem vnd beraitem silber, als o^vch die pfandbrief wistent vnd saitent, die darumb geben sint, des selben silbers er och vns gantzlich vnd gar gewert vnd bezalt hat an den stetten, da wir v´nsern fromen vnd nutz mit geschaffet habent vnd v´nsern schaden gewendet. Vnd darumb so haben wir v´ns mit gůter vorbetrahtung vnd beschaidenhait mit wolbedahtem sinn vnd mút willeklich vnd frilich verzigen vnd verzihen v´ns mit disem brief fúr vns fúr allú v´nsri geswústergit vnd fúr alle v´nser erben der selben nidern burg gu^eter vnd o^vch pfandschatz aller kuntschaft aller zúgnust lút vnd brief, so wir ietz darumb habent oder hernach vinden mo^ehtin, alles rehten gaistlichs vnd weltlichs gerihtes aller vordrung vnd ansprach, so wir zů der vorgeschriben burg gu^etern vnd pfandschatz ie gehept habent oder hernach gewinnen mo^ehtin von dehainen sachen. Es ist o^vch mit bedingoten worten berett, wa^er dz wir alle oder dehainer vnder vns dehain brief ietz hetti von der vorgeschriben burg gu^eter vnd pfandschatzes wegen oder hernach iemer funden wurdint, dz wir die selben brief o^vch v´nserm vorgenemten herren abt Georien oder sinen nachkomen vnuerzogenlich widergeben súllent vnd daz sú v´ns vnd allen v´nsern erben vnd nachkomen gar vnd gantzlich tod vnd vnnútz sin sont vnd o^vch v´nserm vorgenemten herren abt Georien sinen nachkomen vnd dem selben gotzhus ze sant Gallen eweklich vnscha^edlich sin vnd wesen sont. Wir habent o^vch alle drig gelopt bi v´nsern truwen in aides wis, bescha^eh dz dehain vnser swo^ester oder ieman von ir wegen die vorgeschriben burg gu^eter vnd pfandschatz anspra^echint v´nserm vorgenanten herren abt Georien oder sinen nachkomen oder die, in der hand dann die selben gu^eter komen sint von des selben gotzhus wegen, dz wir sú dann ân allen iren schaden darumb verstan vnd versprechen sont nach dem rehten vnd von der ansprach entrihen vnd ledig machen ân geua^erd. Vnd des ze ainer warhait aller diser vorgeschriben ding vnd beding henken wir die vorgenemten Diettegan, V^olrich vnd Růdolf die Mayger von Altstetten gebrůder v´nsri insigel fúr v´ns fúr a^ellú v´nsri geswústergit vnd fúr alle vnser erben an disen brief. Der geben ist ze Flums⁷ an dem na^ehsten samstag vor sant V^olrichs tag in dem jar, do man zalt von gottes gebúrt drúzehundert jar vnd darnach in dem drú vnd sibentzigosten jar.

Source Fulltext: Chartularium Sangallense IX, Nr. 5365, S. 41-42.