Allen den, die disen brief ansehent oder ho^erent lesen, kúnde ich Heinrich von Helmenstorf ritter vogt¹ vnd wir der rat der || statt zê Rapreswil² vnd veriehen offenlich an disem brief, daz fúr v´ns kamen an offen frij strasse Bilgri Russinger, || Heinrich Kaltprvnner pfleger vnd brůder Hans Banwart meister meister dez spitalz dez heiligen geistez ze Rap||reswil³ ze einem teil vnd Růdolf vnd Johans Brentschinken gebrůder burger Zúrich ze dem andern teil, vnde offnôtent da die vorgenanten pfleger vnd meister fúr sich vnd alle ir nachkomen dez selben spitalz, das si recht vnd redlich ze ko^vffenne geben hettint vnd gebint mit vrkúnd ditz briefs den obgenanten Brentschinken vnd ir beider erben vnd nachkomen einen aker bi einr halben juchart minr ald mer ane geuerd gelegen ze Menidorf⁴, stosset niderthalb an der vorgenanten Brentschinken reben, die man nemt an Isnerren⁵, vnd obrenthalb an die lantstrass, fúr ledig frij eigen mit steg mit weg mit aller rechtunng nútzzen gewonheit vnd zů geho^erd vmb fúnf pfvnt pfenning Zúricher múns genger vnd genemer, der si gantzlich von den selben Brentschinken gewert werint vnd in dez spitals gůten nutz bewendet hettin. Die vorgenanten pfleger vnd meister sont o^vch fúr sich vnd alle ir nachkomen, weihe danne pfleger vnd meister sint ald werdent, dez vorgenanten akers mit aller siner zů geho^erd der obgenanten Brentschinken vnd aller ir erben vnd nachkomen recht were sin fúr ledig frij eigen vnd sú verstan nache recht, wo oder an welen stetten si sin bedurfent oder notdurftig sint, ane alle geuerd, vnd sol sú da vor nút schirmen noch fristen. Die selben pfleger vnd meister hant sich o^vch verzigen vnd verzihent sich fúr sich vnd alle ir nachkomen ze dez vorgenanten spitals wêgen aller eigenschaft rechtunng vordrung vnd ansprach, so sú ald ieman von ir wegen zů dem obgenanten aker ie gehatten ald hie nach iemer mer gehaben oder gewúnnen mo^echten mit geistlichen oder mit weltlichen gerichten oder mit deheinen andren sachen. Vnd dez ze einem warem vrkund vnd gantzer sicherheit alles dez, so vor an disem brief geschriben stat, das es war vnd stet sie nu vnd hie nach, da von so haben wir die vorgenanten der vogt vnd der râtt der stat ze Rapreswil der selben v´nser stat insigel offenlich gehenkt an disen brief, won das vor v´ns also beschehen ist, nach beider teil bett willen. Vnd dez ze merer sicherheit, so vor geschriben stat, so haben wir die obgenanten Bilgri Russinger, Heinrich Kaltprvnner pfleger vnd brůder Hans Banwart meister dez egenanten spitalz dez selben spitals insigel offenlich gehenkt an disen brief. Der geben ist an dem zistag nach sant Barnabas tag in dem jar, do man zalt von gottez gebúrt drúzehenhundert vnd sibentzig jar vnd dar nache in dem dritten jare. Hie bi warent ||
Johans von Wilberg⁶, den man nemt von To^essegge⁷, Claus Walpersperg dez rates vnd ander erber lúte.

Source Fulltext: Chartularium Sangallense IX, Nr. 5362, S. 38-39.