Ich^a) Cůnrat A^eby burger ze Merspurg¹ tůn kunt vnd vergich offenlich mit disem brief allen, die in ansehent oder ho^errent lesen, dz ich mit gůtem willen vnd langer || vor betrahtung nach miner frúnt vnd ander erber lút rat dem erberen herren her Hainrichen von Wil Costentzer² genant priester, Johansen sinem brůder vnd || Mehthilden siner swester vnd Johansen Risen Burkartz des Risen von Wil elichen sun vnd allen iro erben vnd nachkomen fúr mich vnd alle min erben vnd nach||komen hab ze ko^vffen geben recht vnd redlich aines jemer werenden ewigen ko^vffes ain fůder wisses wins gůtes vnd ga^ebes Merspurger messes an geua^erd rechtes zinses vnd ja^erlichs geltes ab disen nach geschribnen minen gůetern, dú ze Merspurg gelegen sint vnd min recht aygen sint. Das erst gůt ist ain wingart mit allen zů geho^erden vff dem Húndlisberg³ gelegen entzwschen Jacobs Owingers vnd Ha^ennis von Schaffhusen⁴ wingarten, den man nempt der Schenk, bayd burger ze Costentz, das ander gůt ist min wingart an Růeterswiller gassen⁵ vff gelegen vor dem byld v´ber vnd stoset ze ainer siten an Hansen Búrres wingarten, des selben garten sint obenan siben stuk vnd vnderhalb vier stuk, das drit gůt ist min wingart in der Gebraiten⁶ gelegen entzwischen Růfen Heldes wingarten vnd V^olrichs Zans wingarten baid burger ze Merspurg. Vss vnd ab den vorgeschribnen drin gůetern vnd was dar zů geho^ert ald geho^erren mag, hab ich dem selben herr Hainrichen, Johansen vnd Mehthilden geswistergiden vnd Johansen Risen dz selb fůder wins ewiges geltes geben vmb den vorgeschriben wingarten vff dem Húndlisberg gelegen vnd vmb ainen torgel in der vorburg ze Merspurg gelegen an Hansen Wintzvrnen hus vnd o^vch vmb sehstzehen pfunt pfennig Costentzer, die sú mir dar zů geben ha^vnt, da mit ich minen grosen schaden gewendet ha^vn, vnd hant mir o^vch die selben gůeter geuertgot alz recht ist. Dz selb ja^erlich gelt han ich inan geben mit dem rechten, dz ich vnd alle min erben vnd alle die, in dero hand vnd gewalt die obgenanten gůeter jemer stand vnd koment, nu hinnan hin dem selben her Hainrichen, Johansen vnd Mehthilden geswistergiden vnd Johansen Risen vnd allen iren erben vnd nachkomen ain fůder wisses wins gůtes vnd ga^ebes allú jar je ze herbst zît in dem winemot vnder der rinnen in iro vasse vnd jemer me ewenklich ab den selben vorgeschriben gůetern vnd ab allen den nútzen vnd gelt, so von den selben gůetern geuallent oder genauen mugent, verdienot verstúrot an alle minrung an allen fúrtzug vnd an allen iren schaden geben vnd ab richten so^ellint ze rechtem zins vnd nach zins recht an geua^erd, vnd sol allú jar je ze dem ersten sú aines fůder wins weran vsser dem garten vff dem Húndlisberg, vnd was da gebrist, dz sol ich inan ervollan vnd nach ziehen vsser dem wingarten by dem byld v´ber vorbenempt vnd dar nach vsser dem wingarten in der Gebrayten o^vch vor benempt. Vnd gebra^est in den garten allen dryn, dz si nit aines fůder wins gewert mo^echtint werden, so sol ich ald min erben sú ald ir erben doch je aines fůder wins weran an alle wider red bis an iro benůegen an geua^erd, vnd han inan dz selb ja^erlich gelt vss vnd ab den vorgeschribnen gůetern vnd da von vor dem amman vnd dem rat der stat ze Merspurg geuertgot vnd vffgeben mit allen worten werchen vnd geta^eten, so darzů gehort vnd nottúrftig was nach gewonhait vnd nach recht. Ich vnd alle min erben sollint o^vch des selben herr Hainrichen, Johansen vnd Mehthilden geswistergiden vnd Johansen des Risen vnd iro erben des vorgeschriben geltes vnd ko^vffes recht weren sin gen allerma^englich nach recht vnd gewonhait der stat Merspurg an geua^erd. Vnd des alles ze warem vnd offem vrkúnd vnd gůter sicherhait aller vorgeschribner ding vnd geding han ich Cůnrat A^eby gebetten den fromen Hainrichen Scherer stat amman ze Merspurg ze den ziten, dz der sin aygen insigel gehenket ha^vt an disen brief fúr mich vnd min erben, won ich aygens insigels nit en han, dar vnder ich mich vnd min erben bind vnd willenklich gebunden ha^vn sta^et ze halten vnd ze vollefůerren alles, dz diser brief wist vnd sait. Des vergich o^vch ich Hainrich Scherer amman vorbenempt, dz ich durch ernstlicher bett willen Cůntzen A^ebis vorbenempt min aygen insigel gehenket han an disen brief ze zúgnúst aller vorgeschribner ding, doch mir an schaden, won o^vch diser ko^vff disú vertgung vnd disú vergicht vor mir vnd dem rat ze Merspurg beschehen ist vnd vollefůert mit allen den worten werchen vnd geta^eten, alz vor ist geschriben an disem brief. Der geben ist ze Merspurg, do von Cristus gebúrt warent drútzehen hundert vnd fúnf vnd sibentzig jar, an dem frytag vor sant Thomans tag des zwelfbotten.

Source Fulltext: Chartularium Sangallense IX, Nr. 5484, S. 154-155.