Wir graf Heinr. von Montfort herre ze Tettnang¹, graf Hug von Montfort herre ze Bregentz² vnd graf Heinr. von Montfort³ || des egenanten graf Heinrichs sun, Walther von der Hohenklingen⁴, Růdolf von Rosenberg⁵, Walther von Stadigon⁶, Hans von || Rischach⁷, den man nennet Snabel, Vlr. von Lochen⁸, Marquart von Schellenberg von Wazzerburg⁹, Herman Swartzach, Vlr. von || Steinegg¹⁰, Marquart von Baldegg¹¹, . . der Tûssenhuser, Hans von Arensperg¹² vnd Hartman vom Stůl von Heydegg¹³ veriehen vnd tůn kunt offenlich mit disem brief fúr vns vnd vnser erben, als sich nv ze vasnacht hie ze Basel ein vflouf ergangen hat vnd wir darvmb behebt wurden, haben wir zů den heiligen gesworen, ein gantze lutre sůn vnd vruecht darvmb zehalten vnd zehaben ewiklich fúr vnsselb vnser erben all vnser fru^ent helffer vnd dyener mit den erbern vnd wisen . . dem burgermeister . . dem rat vnd . . den burgern ze Basel allen irn frúnden helffern vnd dyenern vnd allen den, die zů in geho^erent, ane alles geue^arde. Vnd geloben ouch by denselben eyden, daz wir noch die vnsern in vnd den irn nymmer wellen noch sullen von der sach vnd getat wegen dhein leyd noch schaden tůn noch schaffen getan werden in dheinem weg. Vnd ob yemant vnsrer fru^ende helffer dyener oder die zů vns geho^erent sich der sach vnd getat wider si oder die irn wolt nv oder hernach annemmen, das sullen wir wenden vnd weren vnd in dawider geraten vnd geholffen sin, als ob es vnser eygen sache wer, vntz vf die stund, daz es hingelegt werd, getrewlich vnd vngeuarlich. Ouch geloben wir in dem namen als da vor, daz wir vns dheiner sach noch getat niemer vnderwinden noch annemmen sullen noch wellen, da mit wir die vorgeschriben sache vnd vfleuff gegen den egenanten von Basel oder den irn gere^achen, ane geue^arde. Vnd des ze vrkund geben wir disen brief versigelten vnder vnser der obgenanten graf Heinrichs von Montfort herren ze Tettnang, graf Hugens von Montfort herren ze Bregentz, Walthers von der Hohenklingen vnd Walthers von Stadigon insigeln, darvnder wir vns die andern verbinden, alles das ste^at zehaben vnd zevolfu^eren, das vor an disem brief geschriben stat. Dis geschach vnd der brief ward gegeben ze Basel an zinstag nach dem sunnentag Invocavit nach Kristi geburde drútzehenhundert jar, darnach in dem sechs vnd sibentzigistem jare.

Source Fulltext: Chartularium Sangallense IX, Nr. 5493, S. 164.