Allen den, die disen brief ansehent lesent oder ho^erent lesen, kúnd ich Hainrich in dem Aîcha¹ vnd vergich offenlich an disem brief vmb die sto^ezze || ansprach vnd missehellung, so ich gehept han mit den pflegern vnd dem spital ze sant Gallen² von ains wasserflusses wegen, der || dâ gât ze Rúti³ an des vorbenemten spitals múli, vnd sunderlich von der stútzen wegen, daruf der wendelbo^vm der selben múli ge||legen ist, darumb ich den selben spital anspra^echig hat, daz die selben stútzen vff minem grund stu^endint, das ich mit den fromen beschaidnen Bartholome vnd Johansen den Blarrern pflegern ze des vorgenanten spitals handen von des obgenanten wasserflusses vnd o^vch von der êgenanten stútzen wegen vnd mit namen vmb alle sto^ezze vntz vff disen húttigen tag lieplich vnd gu^etlich gantzlich vnd gar nach allem minem willen verriht bin, also das ich noch min erben noch nieman anders von minen wegen noch an miner stat die obgenanten pfleger noch ir nachkomen noch den vorgenanten spital von des vorbenemten wasserflusses wegen noch von der stútzen noch mit namen von kainerlay sach wegen niemer angesprechen noch sú daran nit sumen noch irren sond in kain wîse weder mit dem rehten noch âne reht noch mit kainen sachen âne geuerde, das ich alles mit miner trúwe gelo^vpt han vnd lo^vben mit disem brief, vnd han darumb von inen enpfangen ain pfunt vnd fúnf schilling pfenning Costentzer múns, die sú mir darumb geben hant vnd gantzlich von inen gewert bin, vnd han inen darumb zů mir ze rehten wern vnd búrgen geben dis erber lút Eglolff Hablútzel, Hainr. von Rúti, Bertschin Keller von Bu^esenhofen⁴ vnd den Ha^ensiner, die hant ditz búrgschafft alle vnuerschaidenlich v´ber sich genomen vnd gelo^vpt mit semlicher beschaidenhait, wa^er daz ich ald min erben die vorgenanten pfleger ald ir nachkomen vnd den obgenanten spital von des vorbenemten wasserflusses oder von der êgenanten stútzen wegen ald von dehainer ander sache wegen dehainost schadgoti ald sú daran sûmti ald irti in dehainen weg, wie dann die vorgenanten pfleger ald ir nachkomen vnd der vorbenemt spital des ze schaden ka^emint, den schaden allen sol ich vnd min erben vnd die vorbenemten búrgen mit mir inen gantzlich ableggen. Ich han o^vch fúr mich vnd min erben gelo^vpt vnd loben mit disem brief, den obgenanten búrgen vnd iren erben allen iren schaden abzetu^enne, in den sú von dirr búrgschaft wegen komen mugent. Vnd ze ainem wâren vrkúnd so han ich erbetten den vesten ritter herr Hainrichen von Helmsdorf⁵, daz er sin insigel fúr mich gehenkt hat an disen brief, won ich aîgens insigels nit enhat. Wir die vorgenanten búrgen alle viêr veriehen ain gantz warhait aller vorgeschribnen ding, vnd ze mêrer sicherhait der selben ding so habint wir o^vch erbetten den vorgenanten herr Hainrichen von Helmsdorf, daz er sin insigel fúr v´ns o^vch gehenkt hat an disen brief. Ich Hainr. von Helmsdorf ritter vergich, daz ich min aîgen insigel von bett wegen Hainrichs an dem Aîcha vnd o^vch von bette wegen der obgenanten búrgen gehenkt han an disen brief mir vnd minen erben vnscha^edlich. Der geben ist an dem na^ehsten ma^entag vor der alten vasnaht in dem iâr, do man zalt von Cristus gebúrt drútzehenhundert iâr, sibentzig iâr vnd darnach in dem sêhsten jâre.

Source Fulltext: Chartularium Sangallense IX, Nr. 5492, S. 163.