Wir Hainrich von gottes genaden byschof des bystums ze Costentz¹ veriehent vnd tůnt kunt mit vrkúnd diss briefs allen den, die in || an sehent lesent oder ho^errent lesen, das fúr v´ns kament ze Clingnow² in vnser statt des na^echsten samstages vor sant Thomas || tag des zwelfbotten in dem jar, als dirr brief geben ist, die fromen lút her Eberhart von Strass custer ze Múnster in Ergo^ew³ || vnd Eberhart von Strass⁴ sin vetter sesshaft ze Frownuelt⁵ mit dem edlen vnserm lieben o^eham graf Donaten von Tokkenburg⁶, vnd offenbarten da die selben her Eberhart vnd Eberhart von Strass vor vns vnd sprachent, dz sú von iro redlichen not wegen die vesti vnd die burg ze Spiegelberg⁷, als die graben begriffen hant, gelegen in vnserm vorbenemten bystum, die burghalden vnd sehs juchert reben gelegen an der selben burghalden vnd die hofraiti, die dar zů geho^ert, vnd den Tobelhof⁸ gelegen vnder der selben burg ze Spiegelberg mit allen zů geho^erden, die von v´ns vnd vserm^a) gozhus ir reht lehen wa^erint vnd sú von Guntram sa^elgen von Spiegelberg⁹ an erstorben sint mit andern lúten vnd gu^etern, ain rehten redlichen vngeuarlichen ewigen besta^eten koffes ze koffen geben hetten dem obgenanden vnserm o^eham graf Donaten vnd graf Dyethelmen von Tokkenburg¹⁰ gebrůdern vnd im erbun, als der koff brief¹¹ wist vnd sait, der dar v´ber geben ist, vnd gabent vns och da ze stett die vorbenemten her Eberhart vnd Eberhart von Strass die obgenanden burg ze Spiegelberg die burghalden die reben hofraitinen vnd den Tobelhof mit allen rehten núzzen vnd gewonhaiten vnd mit allen zů geho^erden, als reht sitt vnd gewonlich was vnd als es kraft vnd maht hat vnd haben sol vnd mag nû vnd hernach, ledklich vnd frilich v^f an vnser hand vnd verzigen sich och da vor vns aller rehtung vordrung vnd ansprachen, so sú ald iro erbun zů der vorgenanten burg ze Spiegelberg^b) ze der burghalden hofraitinen reben vnd Tobelhof gar ald an dehainen tailn nû ald hernach yemer ko^enden ald mo^ehtin gesprechen in dehain wis ald weg ald mit dehainen andern sachen, vnd batent vns ernstlich, die egenanten burg burghalden wingarten vnd hof denan vorgenanten vnsern o^ehamen graf Donaten vnd graf Diethelmen von Tokkenburg gebrůdern baiden gemainlich lihen. Das taten wir durch ir bett vnd haben die vorgenanten burg burghalden hofraitinen wingarten vnd hof mit allen rehten núzzen vnd gewonhaiten vnd mit allem dem, so von reht oder gewonhait dar zů oder dar in geho^ert ald geho^eren sol von reht ald gewonhait, es si benemt oder vnbenemt, verlihen vnd^c) lihent och mit vrkúnd diss briefs dien selben vnsern o^ehamen graf Donaten vnd graf Dyethelmen von Tokkenburg gebrůdern baiden gemainlich vnd vnuerschaidenlich ze rehtem lehen vnd ze ainer rehten gemaind, vnd ist dis alles reht vnd redlich beschehen vnd vollefu^ert mit allen worten werchen ra^eten vnd geta^eten, so dar zů geho^ert gut núzze oder notdúrftig waren vnd als reht sitt vnd gewonlich was. Vnd ze offem warem vrkúnd vnd sta^eten sicherhait aller vorgescribner ding vnd geding habint wir byschof Hainrich da vor genant vnser insigel offenlich gehenket an disen brief. Der geben ist in vnser vorgenanten statt ze Clingnow an dem obgenanden tag in dem iar, do man zalt von Cristus gebúrt drúzehenhundert iar, sybenzig iar vnd dar nach in dem sehsten iare.

Source Fulltext: Chartularium Sangallense IX, Nr. 5548, S. 219-220.