Allen^a) den, die disen brief an sehent lesent oder ho^errent lesen, tůnt wir Eberhart von Strass custer ze Múnster in Ergo^e1 vnd Eberhart von Strass² sin vetter sesshaft ze Vrownuelt³ kunt vnd veriehent || offenlich mit vrkúnd diss briefs fúr vns vnd alle vnser erben vnd nachkomen, die wir vesteklich her zů bindent, das wir mit gůter vorbetrahtung vnd beschaidenhait vnd von vnserr grossen geltschuld wegen, dar vmb || wir gro^esslich an wachsendem schaden stůndent, die vesti vnd burg Spiegelberg⁴ in Costenzer bystum gelegen, lút vnd gu^eter, so dar zů geho^errent, als v´ns von^b) vnserm lieben o^ehan Guntran sa^elgen von Spiegelberg⁵ an erstorben || sint, reht vnd redlich verkoffet habint, als hie nach gescriben stat vnd als sú hie genemmet sint, des ersten die vesti vnd burg Spiegelberg in Costenzer bystům gelegen die rúti den bongarten den akker vnder dem bongarten gelegen ob der selben vesti die hofraitinen alleklich, die zů der vesti geho^erent, das burgstal, da die burg vff stat, die burghalden zwen wingarten gelegen an der selben burghalden den bongarten vnder dem ainen wingarten vnd den torgel dar inne, den Tobelhof⁶, ain gůt genant des Valken gůt, ain wise genant dú Hůb wise⁷, ain wise genant des Wezels wise, ain gu^etli genant in dem Biuang⁸, ainen hof genant der Wingart⁹, ainen bongart genant des Sweglers bongart, ain bongart genant des Mitlers bongart, den holz akker vnder kilchen, ain gůt genant des Fridolzhofers gůt, ain hofstat genant des Fro^elichen hofstat, die hůb den wisblez in Gundelzbrunnen¹⁰, die da gehorrent in des Fridolzhofers gůt, die wise die rúti hinder Bilch¹¹, den akker in Flanzen¹², dú hofstat genant des Vischers hofstat, das holtz genant Schaidegg¹³, die vogtay v´ber das dorf ze Wezzicon¹⁴ geriht twing vnd ba^enn v´ber holz v´ber veld v´ber lút v´ber gu^eter, die zů dem selbun dorf gehorrent vnd in dem selben dorf gesessen sint, vier pfunt zwelf schilling fúnf pfenning Costenzer múnss vsser dem selben dorf ja^erlichs geltes ze vogt reht, zehen schilling pfenning der vorgenanten múnss ze lo^enstúr, aht schaf zwainzig hu^enr drúzehen fůder buwes alles ja^erlichs geltes vsser der selbun vogtay vnd dorf ze Wezicon, fúnfzehen tagwan ze mayen fúnfzehen tagwan ze herbst in die obgenanden reben och vss den obgenanden gu^etern ze Wezicon vnd och alle die reht vnd nútz, alls die von Spiegelberg vnd wir bis her genossen habint vsser dem selben dorf vnd vogtay, vnd alle die manschaft, die Gúntran sa^elig von Spiegelberg ze lihen hatt, vsgenomen das die Verren von Frownuelt vnd von Wintertur¹⁵ von im ze lehen hatten, wir hant och verkoffet mit der vorgenanten vesti dis nachgescribnen lút V^olrichen vndern Bornen zwai siner kind, Hansen Fro^elich sin wip vnd siner kind fúnfi, Ma^ehthilt in dem Wald zwen ir sún, die Jochin von Halden Johans ir sun ir tohter Ita zwai ir kind, Ru^edi Wagner von Winuelden¹⁶, Adelhaiden Treffin vnd ir tohter von Wisendangen¹⁷, Cu^eni Fro^elich von Wingarten Annen sin tohter zwai ir kind, Cu^eni von Haiterschen¹⁸, Gůtan Claus Pengglers wip zwai ir kind, Ru^edin Sigi sin wip vnd drú siner kind, Eberli von Haiterschen, Adelhaiden des Wagners wip kind, Cu^enin Fridolzhofer, Ita Ru^edis tohter von Haiterschen, Hainrichen vndern Bornen halben, Cu^enin Winzúrn, Johans Rúmpfli vnd siner kind ains, die selben lút vnd och die obgenanden vesti gu^eter geriht vogtay twing vnd ba^enn, als vor ist gescriben, hant wir mit gůtem wisem rat vnser frúnd vnd ander erber lút mit allen den rehten núzzen vnd gewonhaiten, so dar zů ald in die selben gu^eter vnd vesti geho^ert oder geho^eren sol von reht ald gewonhait, mit hus mit hof mit hofraitinen mit holz mit veld mit wun mit waid mit wisen mit akran mit wasen mit zwi mit wasser mit wasserrúnsen mit steg mit weg mit in gengen mit vs gengen mit allen zů geho^erden vnd och mit allen den rehten vnd gewonhaiten, als die von Spiegelberg vnd wir bis her braht inne gehebt vnd genossen hant, fúr v´ns vnd vnser erbun aines rehten redlichen besta^eten vngeuarlichen ewigen koffes ze koffen geben den edlen wolerbornen herren graf Donaten vnd graf Diethelmen von Tokkenburg¹⁹ gebrůdern grafen ze Brettengo^e20 vnd ze Thafaus²¹ vnd och allen iren erbun vnd nachkomen vnd gebent inan es^c) koffen reht vnd redlich mit vrkúnd diss briefs fúr vns vnd alle vnser erben vnd nachkomen, die wir vesteklich her zů gebunden habint, vmb ailf hundert vnd drissig vnd dri guldin gůter vnd genger, der selben guldin wir von inan gar vnd ganzlich bezalt vnd gewert sint mit baren guldin vnd in vnsern vnd vnsrer erbun offen nutz vnd schinbern nutz komen vnd bewendet sint an den stetten, da wir vnsern vnd vnsrer erben wachsenden schaden mit fúrkomen vnd gewendet habint. Wir hant och die vorgenanten vesti vnd burg, als die graben begriffen hant, die hofraiti die burghalden vnd zwen wingarten an der selben halden vnd den Tobelhof mit allen rehten vnd zůgeho^erden von ainem bischof von Costenz fúr reht lehen, die obgenanden vogtay ze Wezzicon fúr lehen von dem hailigen rich vnd dz gůt genant des Fridolzhofers gůt fúr reht ledig aigen vnd a^ellú vorgenanten anderrn gu^eter lút vnd manschaft fúr lehen von Tokkenburg, mit allen rehten núzzen vnd gewonhaiten vnd mit aller zů geho^erd vnd mit allem dem, so von reht ald gewonhait dar zů oder dar in geho^ert oder geho^eren sol von reht oder gewonhait, es sig benemt oder vnbenemt, denan vorgenanten edlen wolerborn herren graf Donaten vnd graf Diethelmen von Tokkenburg gebrůdern baiden gemainlich vnd vnuerschaidenlich vnd im erben geuertgot vf geben vnd ze im handen braht, als reht sitt vnd gewonlich was vnd als es kraf^d) hatt vnd haben sol vnd mag nû vnd hernach, vnd won wir den selben koff gen den vorgenanten herren wissentlich als reht vnd redlich vnd als vngefarlich getan vnd vollefúrt habint, so habint wir vns baid gemainlich vnd yetwedre besunder die vorgenanten herren graf Donat vnd graf Diethelm von Tokkenburg gesezt in liplich vnd nutzlich gewêr der vorgenanten vesti lút vnd gu^eter mit allen zů geho^erden. Wir habint och mit wolbedahtem můt wissentlich entwert vnd verzigen vnd entwerent vnd verzihent vns mit vrkúnd diss briefs fúr vns vnd alle vnser erben vnd nachkomen aller aigenschaft aller manschaft aller lenschaft aller kuntschaft aller besazzung aller gewêr aller zúgnust lút vnd brief vnd sunderlich des rehten, dem man spricht gemain verziehen vervah nit, vnd och des rehten, da mit wir vs geziehen vnd gesprechen mo^ehtin, das wir in dem vorgenanten koff in dehain wis oder in dehainen weg betrogen wa^erint ald das wir der vorgenanten guldin nit ganzlich bezalt vnd gewert wa^erint, vnd och aller der rehten gaistlichs vnd weltlichs gerihtes, die ietz gesezt vnd gemacht sint oder her nach gesezt oder gemacht mo^ehtint werden, vnd och aller der vordrung vnd ansprach, so wir zů der vorgenanten westi^d) lút vnd gu^etern ganzlich oder an dehainen tailn von reht oder gewonhait ye gehebt habint vnd wir vnd vnser erben hernach yemer gewinnen vnd erwerben mo^ehtin in dehain wîse oder in dehainen weg. Wir die vorgenanten Eberhart vnd Eberhart von Strass habint och gelobt vnd lobent och mit vrkúnd diss briefs mit vnsern gůten trúwen, die vorgenanden vesti lút vnd gu^eter alleklich ze entrihen ledig vnd los ze machen an allen den stetten, da sú haft sint, ane allen im schaden, vnd habin och gelobt vnd lobent mit vrkúnd diss briefs, der vorgenanden vesti lút vnd gu^etern reht wer ze sinne nach dem rehten baid gemainlich vnd vnsrer yetwedre besunder vff gaistlichen vnd weltlichen gerihten, wa wenn ald wie dik die vorgenanden herren von Tokkenburg oder ir erbun des bedurfint dar vmb vf getriben an gesprochen werdent, daz wir vnd vnser erbun sú vnd ir erben vnd nachkomen dar vmb versprechen vnd verstan so^ellint ane allen im schaden vnd ane allen fúrzug vnd widerred. Die vorgenanden herren von Tokkenburg vnd ir erbun hant och vollen gewalt, ob sú angesprochen werdint von der vorgenanten vesti lúten vnd gu^etern wegen allen oder an dehainen tailn, an reht ze bieten vor vnsrer gna^edigen herschaft von O^esterich vor ir ra^eten vor ir lantgeriht oder vor dem byschof von Costenz, dannen die vorgenand vesti lehen ist, da sont wir sú och verstan in aller wise vnd rehten, als vor gescriben ist. Vnd her vmb vnd vmb alle vorgescribnen ding vnd geding ze merer sicherhait so hant wir obgenanden Eberhart von Strass custer ze Múnster in Ergo^e vnd Eberhart von Strass sin vetter zů vns ze rehtem angúlten vnd wem geben vnd gesezt den fromen Cůnraten von Gachnang²² sesshaft ze Keficon²³, der och mit vns fúr sich vnd sin erben mit gůten trúwen in aides wise gelobt hat, allú vorgescribnú ding vnd geding stuk vnd artikel ze volfu^eren ze entrihen wer ze sinne sta^et ze haben in aller wise, als wir vns hervmb verbunden habint, als vor gescriben ist. Dar zů habint wir och vnd der selb Cůnrat von Gachnang zů vns ze rehten búrgen vnd giseln geben vnd gesezzet dis nachgesribnen erbern lút Johansen von Brunberg²⁴, Růdolfen von Wellenberg²⁵, Cůnraten von Múnchwille²⁶, Johansen Schulthaissen von Griffense²⁷, Herman Scharpfenberg vndervogt ze Frownuelt, Clausen Amman burger ze Frownuelt, die och mit ir gůten trúwen in aides wise gelobt hant. Bescha^eh, das wir der vorgescribnen ding vnd geding stuk vnd artikeln ganzlich oder an dehainen tailn nit ta^etint vnd vollefůrtint in aller der wise, als vor gesriben ist, wenne wir die an gúlten alle drie oder dehainer vnder v´ns oder die vorgenanden búrgen vnd gisel oder dehainer vnder inan dar vmb ermant werdent ze hus ze hof oder vnder ogen mit botten ald mit briefen, so so^elint^e) vns vnd der denn gemant ist nach der ersten manung antwrten mit sin selbes lib gen Wintertur oder gen Wîl²⁸ in der stett aintweder, weder der wil, der denn gemant ist, inwendig den na^echsten aht tagen in ains offen wirtes hus vnd da ye zwai vnuerdingti mal nemen vnd laisten ye ze dem tag ane alle gefa^erd, wa^er aber, das sich dehainer selb nit antwrten laisten wolt ald moht, der sol vnd mag ainen erbern kneht mit ainem mu^essigen pfart an sin statt legen in der vorgenanten stett aintweder mit wissen der vorgenanden herren oder ir amplúten vnd der ze den maln als túr kom, als er selber laist, ane geua^erd, vnd wenn sich vier wohen ergant vnd vskoment nach der ersten manung, so hant die vorgenanden herren von Tokkenburg vnd ir erbun vnd ir helferr vollen gewalt vnd friges vrlob, v´ns vnd vnser erben den obgenanden angúlten Cůnraten von Gachnang vnd sin erben dar vmb ze noten ze pfenden an ze griffen mit geriht vnd ane geriht an vnsern lúten vnd gu^etern, wa wenn vnd wie es inan vnd im erben fůglich vnd notdúrftig ist, vff dem land vnd in den stetten, bis sú des, dar vmb sú denn gemant hant, ganzlich vsgeriht vnd gewert werdent, vnd so^ellint doch dar vmb dester minder nit laisten, bescha^eh och, daz der vorgenanten búrgen dehainer brâch vnd nit laist, als vorgesriben ist, den hant och die vorgenanten herren ir erben vnd ir helfer vollen gewalt vnd friges vrlob ze no^eten an ze griffen als vns in aller wise, als vorgescriben stat, vnd sol vns noch vnser erben noch die vorgenanten angúlten noch búrgen noch ir erben noch der angúlten vnd búrgen lút noch gu^eter hie vor noch da wider nit schirmen noch gůt sin enkain geriht gaistlichs noch weltlichs noch enkain frihait des kaisers der herren der stetten der búrgen des landes noch enkain burgreht stettreht lantfrid lantreht noch enkain geselleschaft gesezt noch gewonhait noch enkain ander sach noch fúrzug, die obgenanden edlen herren von Tokkenburg vnd ir erben hant och gewalt vnd friges vrlob, vns obgenanden angúlten vnd och búrgen allen ald ainem^f) oder zwain, wie es inan da mit fůglich ist, tag ze geben oder ze manen, wie dik es inan fůglich ist, vnd sol inan noch im erben endehainen schaden bringen. Wa^er aber, das vnser angúlten oder búrgen dehainer ab gieng von todes wegen oder vnnútz wrde von dehainer ander sach wegen, so so^ellent wir inwendig dem na^echsten manot, so er an vns geuordrot wirt, ainen andern als gewissen an des abgangen statt geben, ta^etint wir des nit, wenn wir denn dar vmb ermant werdent von den obgenanden herren von Tokkenburg ald von ir gewissen botten, so sont wir vnd die andern, die den dar vmb gemant werdent, laisten in aller wise, als vorgesriben ist, bis inan ain ander angúlt vnd búrg wirt geben vnd gesezt an des abgangen statt. Wir obgenanden von Strass haben och gelobt, den vorgenanten angúlten vnd búrgen ze entrihen vnd ledig ze machen von allem dem schaden, in den sú koment von dirr búrgschaft vnd giselschaft wegen, ane allen im schaden, ta^etint wir des nit, so hant sú vollen gewalt vnd friges vrlob, vns vnd vnser erben ze no^eten an ze griffen als vnser obgenanden herren von Tokkenburg, als vor gesriben stat. Vnd des ze warem vnd offem vrkúnd vnd ze ainer sta^eten sicherhait aller vorgescribner ding vnd geding stuk vnd artikeln so hant wir obgenanden Eberhart von Strass custer ze Múnster in Ergo^e vnd Eberhart von Strass sin vetter sesshaft ze Frownuelt vnsrú aigenú insigel offenlich gehenket an disen brief. Wir die obgenanten Cůnrat von Gachnang angúlt, Johans von Brunberg, Růdolf von Wellenberg, Cůnrat von Múnchwille, Johans Schulthaiss von Griffense, Herman Scharpfenberg vndervogt ze Frownuelt, Claus Amman burger ze Frownuelt búrgen vnd gisel veriehent ainer ganzen warhait aller der ding vnd geding stuk vnd artikeln, so die obgenanden von Strass von v´ns an disem brief veriehen hant vnd als von v´ns an disem brief gesriben stat, vnd des ze vrkúnd vnd ze ainer sta^eten sicherhait aller vorgesribner ding vnd geding stuk vnd artikeln so hant wir och all vnsrú aigenú insigel offenlich gehenket an disen brief zů der vorgenanten von Strass insigel. Dirr brief geben wart ze Frownuelt in der vorgenanten statt an dem na^echsten ma^entag nach sant Thomas tag des zwelfbotten vor wihennaht in dem iar, do man zalt von Cristus drúzehenhundert iar, sybenzig iar, dar nach in dem sehsten iar.

Source Fulltext: Chartularium Sangallense IX, Nr. 5549, S. 220-224.