Wir Eberhart etc. kunden, dz wir vmb das gůt gelegen ze Ow ze Obernnzell¹ hus vnd torggel vnd der wingart daby gelegen, des vff zwo^elff manngrab ist, das wylanndt Walthers Swartzen vnnder Súlen² ze Costenntz was, das Hans von Nenngeswyler bu^erger ze sant Gallen vnd der Keller ze Ru^edlingen schůlmaister ze Blaubu^eren baid gemainlich in rechter gemaind von vnns vnd vnnserm gotzhus ze rechtem lehen gehept hand, dz der obgenant Hanns von Nenggenswyler fu^er v´nns kommen ist vnd haut vnns gebetten, das wir sinen halbtail des egenanten gůts von im vffnemind an vnnser hannd vnd es lihind dem erbren Hainrichen Sidenfaden von sant Gallen, also dz derselb Hainrich an siner statt dasselb halbtail solti han vnd niessen mit dem vorgenanten schůlmaister ze Blaubúren, die bett habend wir williclich erho^ert vnd habend das von^a) demselben Hannsen von Nenggenswylr dasselb halbtail des obgenanten gůts vffgenomen an vnnser hannd vnd es gelyhen dem vorgenanten Hainrichen Sidenfaden gelihen vnd lihend im das mit disem brieff, also das derselb Hainrich das obgenant gůt hus torggel vnd wingarten an des genanten Hannsen von Nengis(wyler) statt mit dem schůlmaister von Blaubúren gemainlich haben vnd niessen sol von vnns vnd vnnserm gotzhus vngeirrt. Vnd ist diss alles beschehen mit aller der gehúgde etc. Dat. ut supra.

Source Fulltext: Chartularium Sangallense IX, Nr. 5554, S. 226.