Wir Eberhart¹ von gottes genaden abbte etc. kúnden, das fu^er vnns kam vff den tag, als diser brieff geben ist, der erber Hanns von Nenggeswiler² burger ze sant Gallen, vnd offnet vor vnns, dz er vnd Aulbrecht von Lindemberg schulthaiß ze Wyl³ vnd Liechtensteig der schriber vnd der Keller von Ru^edlingen⁴ schůlmaister ze Blaubúren⁵ alle vier gemainlich ze rechter gemaind von vnns vnd vnnserm gotzhus ze lehen gehept hettind das gůt gelegen ze Ow⁶, das wylandt Walthers des Swartzen von Costenntz was, das man nempt^a) der Wythoff, des vff viervndzwaintzig manngrab reben ist, vnd das si von ir redlichen not wegen dasselb gůt dem erbern vnnsers gotzhus man Bu^ercklin Mu^emler bůrger ze Ow vnd sinen erben zekouffen geben hettin vmb drúvndviertzig pfunnd gůter vnd genemer Costenntzer pfenning, die si von demselben Bu^ercklin empfangen hettind vnd die in irn redlichen nutz komen vnd bekert warn. Nach diser offnung gab vnns der egenant Hanns von Nenggenswyler an sinselbs vnd der obgenanten siner gemainder statt Aulbrechts von Lindenberg, Liechtensteigs des schribers vnd des schůlmaisters von Blaubúren das vorgenant gůt vff an vnnser hannd vnd verzeich sich daran aller vordrung vnd ansprauch vnd alles des rechten, so er ald dieselben sin gemeinder an demselben gůt hatten ald hernach yemer gewinnen mo^echten. Vnd lo^vpt ouch derselb Hanns Nenngenswyler fu^er sich vnd sin gemeinder, des vorgeschribnen kouffs weren zesind nach recht. Vnd batt vnns dasselb gůt dem vorgenanten Bu^ercklin Mu^emler vnd sinen erben dochtren vnd knaben lyhen. Das haben wir geton vnd habend das egenant gut demselben Bu^ercklin Mu^emler gelyhen vnd lihentz im vnd sinen erben dochtren vnd knaben recht vnd redlich mit disem brieff ze rechtem lehen. Vnd ist dis alles beschehen etc. Datum an sant Hylarien tag anno domini MCCCLXX septimo.

Source Fulltext: Chartularium Sangallense IX, Nr. 5552, S. 225.