Universis presencium inspectoribus tam presentibus quam futuris Heinr. abbas monasterii sancte Marie in Rúti¹ ordinis Premonstratensis Const(anciensis) diocesis subscriptorum noticiam cum salute. Ne ea, que aguntur in tempore, labantur cum tempore, necessum est scripturarum testimonio perennari. Nos igitur abbas prefatus ob reverenciam sacrosanctissimi corporis domini nostri Iesu ac honorem sanctorum martirum Pancracii, Mauricii sociorumque suorum patronorum ecclesie parrochialis in Bollingen² bene deliberato animo ac propria voluntate ducti statuimus ordinavimus et promisimus et ad hec servanda constringimus et alligamus nos omnesque successores nostros, ut annuatim de dote eiusdem ecclesie prefate nos respiciente dentur duo maltra avene mensure Thuricensis in auxilium luminis perpetui ardentis in eadem ecclesia prenotata. Item volumus, quod si, quod absit, predicta dos magis valere non potuerit quam duo maltra avene, adhuc eadem cedere ac venire in auxilium luminis prescripti. Item ordinavimus et ratum habere volumus omnes nostros successores, quod si prescripta dos, quod absit, in tantum decreverit, ut duo maltra persolvere nequiverit, quod de decima eiusdem ecclesie cedent ac ministrentur in subsidium luminis sepefati. In quorum omnium ac singulorum perhenne testimonium presentes litteras sigillo nostro duximus muniendas. Acta sunt hec anno domini M° CCC° LXX° VII° in die sancte Margarete virginis et martiris gloriose.

Source Fulltext: Chartularium Sangallense IX, Nr. 5592, S. 263.