Wir Wenczlaw von gots gnaden Romischer kung zu allen zeiten merer des reichs vnd kung zu Behemen^a) embieten || den burgermeistern den retten vnd den burgern gemeinlich der stete Vlmen, Costenicz, Ezselingen, Rutlingen, || Rotweile, Weile, Vberlingen, Memmingen, Bibrach, Rauenspurg, Lindow, sand Gallen, Kemptin, Koufbauwern, Liut||kirch, Ysnyn, Wangen vnd Buchorn vnsern vnd des reichs lieben getrewen vnser gnade alles guet. Lieben getrewen, alz nuelichen zu Rotenburg eyne sune vnd etzliche andirre teiding czwischen dem allirdurchluchtigsten fursten vnserm lieben herren vnd vater vnd vns vnserr beider helffern vnd dienern an eyme teile vnd euch euwern helffern vnd dienern an dem andern begriffen geteidinget vnd vorbrieffet sein, alzo senden wir zu euch den edlen Witken von Landestein³ vnsern ratgeben vnd lieben getrewen vnd mit im den ersamen Jacoben probest zu Wolfiramskirchen⁴ vnsern heymelichen schriber vnd lieben andechtigen, vnd haben den mit rechtir wissen empholhen vnd volle macht geben, dieselben vnsers vatir vnd vnser brieffe euch zu geben vnd auch euwir brieffe von euch zu vnsern handen uff zunemen vnd sundirlich die holdunge vnd eyde von euch allen vnd euwir yeczliche sundirlich zu vnsern vnd des reichs handen vnd auch von vnsern wegen zu emphahen, glichirweis alz ab wir selbir do zu keginwortig weren. Dorumbe so gebiete wir euch allen gemeinlich vnd euwir yeczlicher sundirlichen ernstlich vnd vesticlich, das ir den egenanten vnsern getrewen vnd andechtigen dieselben vnser brieffe zu emphahen euwir brieffe zu antworten vnd die holdunge zu vnsern handen zu tuen gehorsam sein sullet an alle widirrede vnd vorcziehen glicherweis alz vns selbir, als ir vnserr swere vngnade vormeyden wollet. Mit urkund dicz briefes vorsigelt mit vnser kunglichen maiestat ingsigel. Geben zu Nuremberg noch gots geburd dreiczenhundirt jar, dornoch in dem siben vnd sibenczegstem jare, an der nehesten metewochen noch send Vitus tage, vnser reiche des Behemischen in dem fumfczenden vnd des Romischen in dem ersten jare.

Source Fulltext: Chartularium Sangallense IX, Nr. 5586, S. 258.