Ich^a) Anna von Altstetten¹ wilent dez Haydenn von Emptz² elichú wirtin tůn kunt vnd uergich mit offnung dis gegenwúrtigen briefes allen den, die || in ansehent oder ho^erend lesen, daz ich mit gůter uorbetrahtung willenklich vnd vnbezwungenlich mit gesundem lib gemachet gegeben vnd zů gefu^eget || han minem lieben brůder Hainrichen von Altstetten³ lút vnd gůt vnd gemainlich allez daz, daz ich ietz han ald iemermer hernach gewinnen mo^eht, ez si varends || ald ligentz benemptz ald vnbenemptz besůchtz ald vnbesůchtz vnd nemlich ze Rebstain⁴ den hof, da ietz Hans am Stain uf sitzet, mit aller zů geho^erd vnd daz gu^etli, daz ietz Hans Wa^ekerli buwet, och ze Rebstain mit aller zů geho^erd, vnd ze Beltzrúti⁵ daz gu^etli mit aller zů geho^erde, da ietz Haini Gesensun uff sitzet, vnd vier mannmat wisan ze Emptz haizent daz Gaismad⁶ vnd aber vier mannmat wisan ze Emptz haisent dez Bo^eschers bru^el vnd fúnf mannmad wisan och ze Emptz haisent im Stochach⁷ vnd vier mannmat wisan aber ze Emptz haisent dez Hasen mat. Dis gema^echt vnd zůfu^egung ist och beschehen vor únserm gena^edigen herren apt Gerigen ze den selben ziten herren dez gotzhus ze sant Gallen⁸, do er ze Appenzell⁹ in siner vesti ze geriht sazz mit dem stab, vnd daz selb gůt allez, daz vorgeschriben ist, benemptz vnd vnbenemptz nam der egenant únser gena^ediger lehenherr apt Geri durch minr bet willen uf an sin hant vnd leh ez minem brůder dem vorgeschriben Hainrichen von Altstetten mit allen den rehten vnd zů geho^erden, als ez do kraft vnd maht solt vnd moht han. Vnd do dis alles also vollfu^eret wart, ze der selben stett do enphieng ich dú obgeschriben gu^eter a^ellú von minem brůder dem egenempten Hainrehen^b) von Altstetten wider ze niezent vnd inn ze hend, alle die wil vnd ich leb, vmb ainen genanten zins, den ich im och rihte vnd gerihtet han a^ellú iar vnuerzogenlich. Ez ist och berett, wenn got úber mich gebútet, daz ich von todes wegen ab gan, so sol der obgenant Hainrich von Altstetten min brůder durch minr sel hails willen gen zway phfunt gůter phfenning Costentzer múns an den buwe der cappell ze Emptz in dem dorf gelegen, aber sol er gen zway phfunt phfenning vmb ain ewig gelt den priestern, ir sig ainr ald zwen, die denn ze der selben cappelle sitzent, vnd alle die wil vnd er dú selben zway phfunt nit an hat gelet, so sol er ia^erklich den selben priestern oder aim, ob nun ainr da wa^er, gen drig schilling phfenning gůter Costentzer múns, daz da mit min iarzit begangen werd. Er sol och gen minem brůder herr Eglolf¹⁰ dem gaistlichen man dez gotzhus ze Phfa^efers¹¹ ain phfunt phfenning vnd dem phaffen ze Lustnow¹² fúnf schilling phfenning vnd den zwain phfaffen ze Altstetten¹³ och fúnf schilling phfenning vnd in daz Ebno^ed¹⁴ den bru^edern ze sant Maria Magdalenen^c) zehen schilling phfenning allez gůter Costentzer múns. Vnd aller diser vorgeschribner ding ze ainem waren vnd offnen urkúnd so henk ich dú egenant Anna von Altstetten wilent dez Haiden sa^eligen von Emptz elichú husfrow min aigen insigel an disen brief. Ich der egenant Hainrich von Altstetten uergich och offenlich mit urkúnd dis briefes, allez daz voll zefu^erent ze volbringend vnd ze vollaistend von miner swester wegen ze hant nach irm tod, daz von mir hie uor an disem brief geschriben sta^vt, vnd och daz dis allez also war vnd vest belib vnd och aller diser vorgeschribner sach ze ainem waren offnem vnd werenden urkúnd so henk ich och min aigen insigel an disen brief. Der geben ward, do man zalt von Cristes gebúrt trúzehenhundert iar vnd dar nach in dem súben vnd súbentzgosten iar, in dem mayen an sant Victors tag.

Source Fulltext: Chartularium Sangallense IX, Nr. 5578, S. 248-249.